24 vjetori i fillimit të bombardimeve të NATO-s ndaj Serbisë

Sot shënohet 24 vjetori i fillimit të sulmeve ajrore të NATO-s ndaj forcave ushtarake policore serbe në Kosovë dhe Serbi.

Më 24 mars të vitit 1999, NATO ndërhyri për të ndaluar gjenocidin e vazhdueshëm serb të kryer kundër popullit të Kosovës.

Pas 78-ditësh të sulmeve, bombardimet janë ndërprerë më 10 qershor 1999, me miratimin e Rezolutës 1244 të Këshillit të Sigurimit të Kombeve të Bashkuara. Ndërhyrja e NATO-s në Kosovë, kishte mundësuar edhe kthimin në shtëpitë e tyre të më shumë se 800 mijë refugjatëve, personave të zhvendosur brenda dhe jashtë Kosovës.

Më 12 qershor 1999 filloi vendosja e rreth 50.000 ushtarëve nga 36 vende të botës, prej të cilëve 30,000 ishin nga vendet e NATO-s. Sot, 24 vjet pas kësaj ndërhyrjeje, trupat e paqeruajtëse të KFOR-it janë në numër më të vogël. Ata janë të vendosur në pjesë të ndryshme të Kosovës me mision paqeruajtës.