25 Prilli, publikohet Lista Përfundimtare e Zgjedhësve. Ja kujt i mohohet e drejta e votimit…

Ministria e Brendshme duke u bazuar në të dhënat e gjendjes civile ka publikuar listën përfundimtare të zgjedhësve, për zgjedhjet parlamentare të 25 prillit.

Ministria e Brendshme bënë të ditur se të drejtën e votës e kanë 3.588.869 shtetas shqiptarë, prej të cilëve:

-50.5 % e tyre janë votues meshkuj dhe 49.5 % e tyre janë votues femra;

-107.024 zgjedhës votojnë për herë të parë dhe,

-1.098 shtetas janë të bllokuar si shkak, apo si rrjedhojë e ligjit të dekriminalizimit;

Numri total i qendrave të votimit është 5199 në rang vendi.

Ministria e Brendshme thekson se i gjithë ky proces i hartimit të listës përfundimtare të zgjedhësve është kryer nën mbikëqyrjen e auditëve teknicienë të Komisionit Qendror të Zgjedhësve. Në çdo etapë të tij, auditët kanë pasur të njëjtin akses që ka Drejtori i Përgjithshëm i Gjendjes Civile në Regjistrin Kombëtar të Gjendjes Civile.

Në vijim të komunikimeve për listën e zgjedhësve, MB nënvizon se ky proces ka kaluar në disa faza në zbatim të dekretit të Presidentit.

– Ekstrakti i parë i përbërësve zgjedhorë u publikua në 5 tetor 2020;

– ekstrakti i dytë i përbërësve zgjedhorë u publikua në 2 nëntor 2020;

– ekstrakti i tretë i përbërësve zgjedhorë u publikua në 1 dhjetor 2020;

– ekstrakti i katërt i përbërësve zgjedhorë u publikua në 4 janar 2021;

– ekstrakti i pestë i përbërësve zgjedhor u publikua në 1 shkurt 2021;

– ekstrakti i gjashtë i përbërësve zgjedhorë u publikua në 2 mars 2021.

Ministria e Brendshme shprehet se çdo qytetar është i lutur të verifikojë emrin e tij në listën e zgjedhësve nëpërmjet shërbimit online në portalin e-albania si dhe për çdo pretendim mund t’u drejtohet zyrave të Gjendjes Civile në bashki dhe njësi administrative, të cilat do të vijojnë të qëndrojnë të hapura nga dita e hënë, deri në ditën e shtunë.

“Lista përfundimtare e zgjedhësve përmbyll kështu procesin e hartimit dhe shpalljes së Listës së Zgjedhësve. DPGJC në çdo bashki, ashtu sikurse deri më tani, do të përmbushë në vijim çdo detyrim ligjor, që rrjedh nga Kodi Zgjedhor i Republikës së Shqipërisë, për përgatitjen e infrastrukturës zgjedhore,” deklaron MPB duke përfunduar:

“Edhe njëherë përfitojmë nga rasti, të ftojmë çdo qytetar që posedon një dokument biometrik, letërnjoftim apo pasaportë, të cilës i ka skaduar afati i vlefshmërisë, t’u drejtohet zyrave të aplikimit, për t’u pajisur me këto dokumente me qëllim që në datën 25 prill, të kenë mundësi të shprehin vullnetin e tyre.”