44% e shqiptarëve panë TV ose video online, e treta më e ulët në Europë

Ndërsa televizioni mbetet një nga mjetet kryesore të informonit për publikun shqiptar, transmetimi i tij përmes internetit dhe shikimi i videove online mbeten më të ulëtat në Europë.

Eurostat bëri të ditur se në vitin 2022 rreth 44 për qind e individëve në Shqipëri u angazhuan në transmetim televiziv ose video në internet, nga 65 për qind që është mesatarja e Bashkimit Europian.

Kjo shifër është e treta më e ulët në Europë pas Bullgarisë me 40 për qind dhe Rumanisë 34 për qind.

Në rajon, më të prirurit për të parë TV dhe video online janë malazezët me 71 për qind dhe serbët 68 për qind. Të dhënat për Kosovën dhe Maqedoninë e Veriut mungojnë.

Europa

Në vitin 2022, 65 për qind e individëve në BE, panë televizor ose video në internet (online).

Në 24 nga 27 vendet e BE-së, më shumë se gjysma e individëve të moshës 16-74 vjeç, përdorën internetin, për të parë TV ose video të transmetuara. Finlanda krenohet me përqindjen më të lartë 93 për qind, e ndjekur nga Holanda 90 për qind dhe Danimarka 89 për qind.

Në anën tjetër, 34 për qind e individëve në Rumani, shikonin TV ose video në internet, 40 për qind në Bullgari dhe gati 50 për qind në Sllovaki.

Transmetimi është më i popullarizuar në mesin e të rinjve

Në vitin 2022, zakonet e transmetimit në internet, zbuluan një ndarje brezash brenda BE-së. Ndjekja e transmetimeve online, ishte veçanërisht e popullarizuar në mesin e të rinjve, me 86 për qind të individëve të moshës 16 deri në 24 vjeç dhe 81 për qind të atyre të moshës 25 deri në 34 vjeç, që përdorin internetin për të parë TV ose video.

Anasjelltas, me rritjen e moshës, pati një rënie të numrit të individëve, të angazhuar në transmetimet online. Në mesin e njerëzve të moshës 55 deri në 64 vjeç, 52 për qind përdorën internetin për të parë TV ose video, ndërsa vetëm 33 për qind e atyre të moshës 65 deri në 74 vjeç, bënë të njëjtën gjë./Monitor/