Presidentja Osmani: Gratë në Kosovë vazhdojnë të luftojnë për të drejtat e tyre

Presidentja Vjosa Osmani tha në Forumin Ndërkombëtar për Gratë, Paqen dhe Sigurinë, se gratë në Kosovë me gjithë të kaluarën, kanë vazhduar dhe vazhdojnë të luftojnë për te drejtat e tyre dhe mbi të gjitha për ta ndihmuar njëra tjetrën.

“Ky forum është një fanar dhe udhërrëfyes duke kërkuar një botë ku të gjitha gratë dhe vajzat do të jetojnë të lira, në paqe dhe në prosperitet. Në një kohë kur konfliktet globale vazhdojnë, agjenda për gratë është e pashmangshme, prandaj jemi bërë bashkë për t’i diskutuar këto çështje.

E ndërsa jemi sot bashkë, dua t’ju them gratë në Kosovë me gjithë të kaluarën, kanë vazhduar dhe vazhdojnë të luftojnë për te drejtat e tyre, përfshirjen e tyre, dhe mbi të gjitha janë këtu për ta ndihmuar njëra tjetrën,” tha Presidentja Osmani në Forumin Ndërkombëtar për Gratë, Paqen dhe Sigurinë që po zhvillohet në Prishtinë.

Ky edicion, tha ajo, është unik në shumë mënyra, sidomos sfidave me të cilat janë ballafaquar gratë dikur dhe me sfidat që ballafaqohen. Na duhen leksionet e kohës, pa e harruar të kaluarën, dhunën seksuale gjatë luftës dhe ndryshimet klimatike e ndikimi i tyre te gratë, tha Presidentja e Kosovës, Vjosa Osmani, duke përfunduar:

“Le të nxjerrim forcë e fuqi nga gjithçka që kemi kaluar e arritur, punë e vështirë por e domosdoshme mbetët paqja, një paqe të cilës i duhen gratë, të frymëzuara nga gratë që punojnë anë e kënd botës, që të hapim një rrugë drejtë një shoqërie me paqe, siguri e prosperitet për të gjithë.”