“53 milionë euro”, ish-ministri Pal Lekaj dënohet me 3 vjet e 8 muaj burg

Ish-ministri i Infrastrukturës, Pal Lekaj sot është dënuar me 3 vjet e 8 muaj burg për keqpërdorim të detyrës zyrtare e dëmtim me dashje të buxhetit të shtetit në rastin e ndarjes së 53 milionë eurove shtesë kompanisë “Bechtel-Enka” për ndërtimin e autostradës “Arbën Xhaferi”. Gjykata Themelore në Prishtinë dënoi Pal Lekajn edhe me ndalim për 3 vjet e gjashtë muaj ushtrimin e funksionit publik në administratë publike.

Fajtorë për këtë vepër janë shpallur dhe dënuar edhe ish-sekretari i ministrisë, Nebih Shatri me një vit e tetë muaj dhe ndalim të ushtrimit të funksionit publik në administratë publike ose në shërbimin publik për 2 vjet, Drejtori i Prokurimit Besim Tahiri me një vit e tetë muaj burgim dhe ndalim të ushtrimit të funksionit publik në administratë publike ose në shërbimin publik për 2 vjet, dhe, këshilltari Eset Berisha me 3 vjet e tre muaj burg si dhe ndalim të ushtrimit të funksionit publik në administratë publike ose në shërbimin publik për 1 vjet.

Ndryshe, ky vendim pritet të ekzekutohet kur aktgjykimi të bëhet i formës së prerë.