8 Marsi, gratë marshojnë, s’festojnë: Nuk dua lule, por dua kontratë pune!

Sot, në shënim të Ditës Ndërkombëtare të Gruas, kolektivi “Marshojmë, S’festojmë” ka mbajtur marshin në Prishtinë me moton “Nuk dua lule, por dua kontratë pune”.

Gratë marshuan nga sheshi “Zahir Pajaziti” deri te sheshi “Skënderbeu” para Qeverisë së Kosovës.

Gratë që marshuan kërkuan drejtësi për gratë e vrara, kërkuan vende pune me moton “Nuk dua lule, por dua kontratë pune”, me pankarta në duar me mbishkrime “liri, barazi, solidaritet”.

Ndryshe, nga viti 2010 deri në nëntorin e vitit 2023, në Kosovë janë vrarë 55 gra. Organizatat për mbrojtjen e të drejtave të njeriut, raportojnë se në të shumtën e rasteve, autorë të vrasjeve kanë qenë bashkëshortët, baballarët dhe djemtë ndërsa kanë fajësuar autoritetet për disa raste, për dështim në mbrojtjen e grave të rrezikuara nga dhuna.