Parregullsi të rënda në procesin zgjedhor, PD i kërkon KQZ-së të dhënat teknologjike

Për shkak të parregullsive të rënda në procesin zgjedhor, Partia Demkratike i ka kërkuar përmes një shkrese Komisionit Qendror të Zgjedhjeve, KQZ, t’i vihen në dispozicion të dhënat teknologjike.

Në shkresën drejtuar Kryetarit të KQZ, Ilirian Celibashi, sigluar nga Sekretari për Çështjet Zgjedhore pranë PD, Ivi Kaso, thuhet se përmes numëruesve dhe vëzhguesve në terren Partia Demokratike ka grumbulluar dhe është duke grumbulluar të dhëna lidhur me parregullsi të rënda në procesin zgjedhor, veçanërisht gjatë fazës së numërimit.

Bazuar në këto fakte, PD kërkon nga KQZ t’i vihen në dispozicion:

“Pamjet filmike në çdo qendër votimi, pamje filmike të numërimit të fletëve të votimit, të dhënat e grumbulluara nga pajisjet e identifikimit, të dhënat e kryëqëzuara ndërmjet pajisjeve të identifikimit elektronik dhe listave të zgjedhësve të nënshkruar mekanikisht.”