Dialogu Kosovë-Serbi, Kurti dhe Vuçiç takohen më 15 Qershor

Takimi i radhës në kuadër të dialogut për normalizimin e marrëdhënieve midis Kosovës dhe Serbisë, do të zhvillohet më 15 Qershor në Bruksel ku do të takohen Kryeministrit Albin Kurti dhe Presidenti serb Aleksandar Vuçiç.

Lajmin e ka bërë të ditur zëdhënësi i Përfaqësuesit të Lartë për Politikë të Jashtme dhe Siguri pranë BE, Peter Stano, duke paralajmëruar edhe prezencën në takim të shefit të diplomacisë evropiane Josep Borell.

“Mund të njoftoj se raundi tjetër i dialogut i ndërmjetësuar nga BE-ja do të mbahet të martën e ardhshme më 15 qershor, ku do të takohen presidenti Aleksander Vuçiq dhe kryeministri Albin Kurti. Këto takime do të ndërmjetësohen nga kryediplomati Josep Borell dhe Përfaqësuesi i Posaçëm i BE-së, Miroslav Lajçak,” tha Peter Stano.

Ndryshe, takimi i 15 Qershorit në mes të Albin Kurtit dhe Aleksandar Vuçiçit po zhvillohet në kulmin e përplasjeve të ashpëra ndonëse në distancë lidhur me Asociacionin e komunave me shumicë serbe, për themelimin e së cilës është firmosur marrëveshja në vitin 2013, dhe sot Kryemnistri i Kosovës thotë se nuk mund të ketë Asociacion njëetnik ndërsa Presidenti i Serbisë i përgjigjet se nëse mendon kështu nuk ka se pse vjen në Bruksel.

Gjithsesi, BE, që nuk i intereson vendimi i Gjykatës Kushtetuese për Asociacionin, pret që palët t’i zbatojnë të gjitha marrëveshjet e firmosura në Bruksel.

“Bashkimi Evropian dhe shtetet anëtare të tij presin nga të dyja palët një përkushim të vazhduar për t’u angazhuar në këtë dialog dhe për t’i zbatuar të gjitha marrëveshjet. Kjo nënkupton që gjithçka për të cilën është arritur pajtim duhet të zbatohet. BE-ja dhe shtetet anëtare të saj presin që institucionet e reja në Prishtinë të angazhohen në mënyrë konstruktive me qëllim të vazhdimit të takimeve të dialogut të lehtësuar nga BE-ja dhe ta kapin mundësinë për ta dërguar këtë proces të rëndësishëm në një përfundim të suksesshëm,” e bëri të qartë zëdhënësi i Përfaqësuesit të Lartë për Politikë të Jashtme dhe Siguri pranë BE, Peter Stano, javën e kaluar kur dhe shpërtheu ky debat Prishtinë-Beograd.