Várhelyi: Presidenca sllovene ka prioritet negociatat

Komisioneri i zgjerimit, Olivér Várhelyi deklaroi se Komisioni Europian do të vazhdojë të punojë me Presidencën Sllovene të BE për hapjen e Konferencës së I-rë Ndërqeveritare me Shqipërinë e Maqedoninë e Veriut.

Pas mos rënies dakord të Këshillit të BE për Çështjet e Përgjithshme për datën e zhvillimit të Konferencës së Parë Ndërqeveritare me Shqipërinë dhe Maqedoninë e Veriut, për hapjen reale të negociatave të hyrjes së tyre në BE, Komisioneri për Zgjerimin dhe Fqinjësinë, Olivér Várhelyi flet për prioritetet e presidencës sllovene.

“Puna do të vijojë në Presidencën sllovene të BE që nis në korrik për të përmbyllur edhe këtë çështje; ne duhet të hapim Konferencat e I-ra Ndërqeveritare me Shqipërinë e Maqedoninë e Veriut si një çështje përparësie.”  

Kriteri i meritës dhe ai i ꞔiftëzimit të vendeve

Shpresat për të zgjidhur mosmarrëveshjen dypalëshe Bullgari – Maqedoni e Veriut mbeten tanimë tek Presidenca Sllovene e BE. Derisa këto shpresa të bëhen realitet situata mbetet ende e pandryshuar. Në takimin e Luksemburgut, dje ministrat e Jashtëm të BE rikonfirmuan rëndësinë strategjike të zgjerimit të BE me anëtarë të rinj si një investim për paqen, demokracinë dhe stabilitetin.

Vetó e Bullgarisë për mosmarrëveshjet me Maqedoninë e Veriut, një konflikt ky dypalësh, mbajti peng edhe Shqipërinë, pasi Këshilli i BE për Çështjet e Përgjithshme të BE nuk pranoi idenë e ndarjes së Shqipërisë nga Maqedonia e Veriut, edhe pse kësaj here të gjitha vendet anëtare të BE ishin dakord se Shqipëria i ka plotësuar kushtet ose përndryshe kriterin e meritës.

Mosndarja e Shqipërisë nga Maqedonia e Veriut ose si po quhet  “ꞔiftëzimi” i tyre po shfaqet si një kriter i ri në kuadrin e metodologjisë së re të zgjerimit, e cila kërkon vendime unanime të anëtarëve të BE, kur është fjala për hapje negociatash anëtarësimi, hapje dhe mbyllje kapitujsh për vende ku këto negociata janë hapur. Ekspertë në Tiranë të procesit të integrimit të  Shqipërisë në BE, pas mos arritjes në Luksemburg të ujdisë për një datë për hapjen e negociatave me Shqipërinë dhe MV janë të mendimit, se metodologjia e re e zgjetimit të BE ka nevojë të përmirësohet. Sipas tyre duhet të zëvendësohet unanimiteti me votë të cilësuar të vendeve anëtare, gjë që do të ruante njëherazi të pacënuar edhe besueshmërinë e BE për vënien në jetë të premtimeve të veta./DW/