Merkel: Varianti Delta i koronavirusit është shqetësues!
Bashkimit Evropian i duhet një vendim më të unifikuar për rregullat e udhëtimit në mënyrë që të parandalohet përhapja e versionit Delta të koronavirusit, tha sot kancelarja gjermane, Angela Merkel.
“Pa asnjë dyshim jemi të shqetësuar me variantin Delta”, u tha Merkel gazetarëve pas mbërritjes në Bruksel për të marrë pjesë në një samit të BE-së.
Në shumë vende të botës janë ngritur shqetësime të mëdha për një valë të re të infektimeve për shkak të përhapjes së variantit Delta të koronavirusit, i cili besohet që është më i transmetueshëm se variantet e tjera.
Por, Organizata Botërore e Shëndetësisë, OBSH, është shprehur se në përgjithësi vaksinat edhe ndaj këtij varianti mbeten shumë efektive.
Më 23 qershor, raporton RFE, Merkel para parlamentit gjerman tha se ajo dëshiron që edhe vendet tjera evropiane t’iu kërkojnë udhëtarëve nga vendet me nivele të larta të të infektuarve me variantin Delta që të hyjnë në karantinë. Këtë masë e zbaton Gjermania ndaj udhëtarëve nga Britania e Madhe.
“Nëse vini nga Britania e Madhë në vendin tonë duhet të hyni në karantinë, por kjo masë nuk zbatohet në gjitha vendet evropiane. Unë do të dëshiroja që të gjitha ta kenë këtë rregull,” tha Merkel.
Çfarë duhet të dini për variantin “Delta” të koronavirusit?
Varianti Delta i koronavirusit është gjetur në më shumë se 80 vende, që kur u zbulua për herë të parë në Indi. Emrin e mori nga OBSH, e cila emërtoi variante të ndryshme sipas shkronjave të alfabetit grek.
Viruset vazhdimisht pësojnë mutacione dhe shumica e ndryshimeve nuk janë shqetësuese. Por ekziston një shqetësim që disa variante mund të zhvillohen mjaftueshëm për të qenë më ngjitës, të shkaktojnë sëmundje më të rëndë, ose të shmangin mbrojtjen që sigurojnë vaksinat.
Ekspertët thonë se varianti “Delta” përhapet më lehtë për shkak të mutacioneve që e bëjnë të futet më mirë në qelizat e trupave tanë. Në Mbretërinë e Bashkuar, varianti tani është përgjegjës për 90% të të gjitha infeksioneve të reja. Në SHBA, sipas të dhënave, ky variant përbën 20% të infeksioneve dhe zyrtarët shëndetësorë thonë se mund të bëhet variant mbizotërues në gjithë vendin.
“Nuk është ende e qartë nëse varianti “Delta” i sëmurë më rëndë njerëzit pasi duhet të mblidhen më shumë të dhëna”, thotë Dr. Jacob John, i cili studion viruset në Indinë jugore.
Studimet kanë treguar se vaksinat që aktualisht po përdoren, AstraZeneca, Pfizer-BioNTech dhe Moderna, funksionojnë kundër varianteve të reja, përfshirë variantin Delta. Sipas një studimi të bërë në Angli, u zbulua se njerëzit që kishin marrë dy dozat e vaksinave ishin të mbrojtur, por shqetësime kishte për ata individë që kishin marrë vetëm një dozë të vaksinave.
Kjo është arsyeja pse ekspertët thonë se është e rëndësishme që njerëzit të vaksinohen plotësisht. Po ashtu ata paralajmërojnë se shpërndarja e vaksinave në të gjithë botën është po kaq e rëndësishme për të luftuar këtë variant të ri të koronavirusit.
