Izraeli rikthen maskat në ambiente të mbyllura, Rusia shënon rekord të viktimave nga koronavirusi
Izraeli riktheu kërkesën për mbajtjen e maskave në ambiente të mbyllura, pas rritjes së numrit të rasteve me koronavirus.
Shqetësimet u rritën pasi autoritetet shëndetësore regjistruan më shumë se 100 raste të reja ditore në disa ditë të njëpasnjëshme. Shumica e tyre lidhen me variantin Delta dhe thuhet se janë importuar nga jashtë.
Izraeli është një nga vendet më të suksesshme në botë sa i përket trajtimit të pandemisë.
Ai ka zbatuar programin më të shpejtë të vaksinimit, duke imunizuar pjesërisht ose plotësisht më shumë se gjysmën e popullsisë.
Por, dhjetë ditë pas heqjes së detyrimit për maska, udhëheqësi i trajtimit të pandemisë në Izrael, Nachman Ash, tha se qytetarët duhet t’i veshin sërish ato në ambiente të mbyllura, për të frenuar rritjen e numrit të rasteve me koronavirus.
“Po shohim dyfishim [të rasteve] ditë pas dite”, tha Ash.
“Një tjetër gjë që është shqetësuese, është se infeksionet po përhapen”, shtoi ai.
Izraeli shtyu për një muaj edhe rihapjen e vendit për turistët e vaksinuar.
Rusia regjistron rekord të viktimave nga koronavirusi
Autoritetet në Rusi raportojnë rekord të viktimave nga koronavirusi, 601; Ndërkohë janë 20.393 raste të reja, 7.916 prej të cilave vetëm në Moskë.
Shifra në kryeqytetin rus është më e larta brenda një dite qysh në fund të janarit.
Zyrtarisht, Rusia i ka të konfirmuara tani mbi 5.4 milionë raste me koronavirus dhe 132,064 viktima.
Situatën e komplikon më shumë edhe hezitimi i qytetarëve rusë për t’u vaksinuar.
Kryetari Moskës, Sergei Sobyanin, ka thënë javën e kaluar se vaksinimi kundër koronavirusit do të bëhet i detyrushëm për 60 për qind të punonjësve në sektorin e shërbimeve publike.
Për shkak të rritjes së numrit të rasteve në javët e fundit, Moska dhe zona të tjera i kanë ashpërsuar kufizimet e lëvizjes së qytetarëve.
Nga 21 qershori, moskovitët mund të marrin shërbime në restorante dhe bare vetëm nëse paraqesin një kod QR, që tregon se janë të vaksinuar kundër koronavirusit, ose një test negativ PCR, që tregon se nuk janë të infektuar./RFE/
