Ndahet nga jeta Ish-Sekretari i Mbrojtjes, Basha: Përherë do të përkujtohet si një mik i madh i shqiptarëve!

Trishtim, mirënjohje dhe nderim të thellë shpreh Kryetari i Partisë Demokratike, Lulzim Basha, në mesazhin e tij pas ndarjes nga jeta të Ish-Sekretarit amerikan të Mbrojtjes, Donald Rumsfeld, i cili do të përkujtohet përherë si një mik i madh i Shqipërisë dhe i shqiptarëve, pa kontributin e të cilit ishte i paimgjaniueshëm anëtarësimi i vendit tonë në NATO.

“Me trishtim mësova ndarjen nga jeta të ish-Sekretarit Amerikan të Mbrojtjes, Donald Rumsfeld, përfaqësues i një plejade të artë vendimmarrësish që e bënë botën më të sigurtë, më të lirë dhe demokratike. Sekretari Rumsfeld do të përkujtohet dhe nderohet përherë si një mik i madh i Shqipërisë dhe i shqiptarëve, kontributi i të cilit ka qenë i paçmueshëm për anëtarësimin e vendit tonë në NATO,” thekson Lulzim Basha në mesazhin e tij përmes rrjetit social Facebook duke përfunduar:

“Mirënjohje dhe nderim të thellë për këtë kampion të lirisë dhe ngushëllimet më të ndjera familjes, miqve e bashkëpunëtorëve të tij dhe popullit amerikan! U prehtë në paqe!”