E frikshme, fshati në Gjermani para dhe pas përmbytjes

Të paktën 67 persona kanë humbur jetën në përmbytjet e mëdha që kanë goditur Gjermaninë dhe Belgjikën. Shumica e viktimave janë nga Gjermania por nëntë persona kanë humbur jetën në Belgjikë duke përfshirë këtu edhe një vajzë 15 vjeçare.

Krahinat më të goditura gjermane janë Rheinland-Pfalz dhe Nordrhein-Westfalen.

Meteorologët për nesër në këtë rajon parashikojnë reshje të dendura shiu ndërsa zyrtarët lokal fajësojnë ndryshimet klimatike.

Autoritetet lokale kanë publikuar fotografinë nga lartë që tregon përmasat e përmbytjes në fshatin Altenburg. Në njërën fotografi shihet se si ishte fshati buzë lumit ndërsa fotoja tjetër tregon se cila është situata pas përmbytjes.

500 ushtarë në terren, shpallet gjendje e jashtëzakonshme

Kryeministri i Nordrhein-Westfalen, njërit prej vendeve më të goditura në Gjermani tha sot se shumë njerëz janë në rrezik.

Gjendje e jashtëzakonshme është shpallur në qarkun Schuld bei Adenau, në rajonin malor Eifel në kufi me Belgjikën dhe Luxemburgun, raportojnë mediat gjermane.

Rreth 500 ushtarë janë dislokuar në zonat e përmbytura për të ndihmuar aty ku gjendje është më kritike, ka bërë të ditur Ministria e Mbrojtjes e Gjermanisë.