Në prag të takimit me Kurtin, Vuçiç: Dorëzimi nuk është opsion!
Në prag të takimit të dytë në mes Kryeministrit të Kosovës, Albin Kurti dhe Presidenti i Serbisë, Aleksandar Vuçiç, në Bruksel nga i cili përveç qytetarëve është dhe BE që pret shumë, Vuçiç thekson se nuk është ndonjë kënaqësi e veçantë kur keni bisedime me përfaqësuesit shqiptar.
“Kurrë nuk është një kënaqësi e veçantë as udhëtimi dhe as qëndrimi në Bruksel kur keni bisedime me përfaqësuesit shqiptar. Mirëpo, për Serbinë është e rëndësishme sepse ndihmojmë popullin tonë në Kosovë, ruajmë paqen dhe stabilitetin që janë të një rëndësie të veçantë për përparimin ekonomik të Serbisë,” tha Aleksandar Vuçiç përmes rrjetit social Instagram ndërsa po udhëtonte drejt Brukselit me avion duke përfunduar:
“Në avion, gjithmonë, si në ditët studentore përsëris lëndën dhe bëhem gati për mbledhje të vështira. Dorëzimi nuk është opsion!”
Ndryshe, Kryeministri i Kosovës, Albin Kurti dhe Presidenti i Serbisë, Aleksandar Vuçiç, sot do të takohen në orën 14:00 në Bruksel, në kuadër të dialogut për normalizimin e marrëdhënieve mes dy shteteve, që ndërmjetësohet nga Bashkimi Evropian.
Takimi i parë mes tyre u zhvillua më 15 qershor, kur procesi i dialogut, i cili u ndërpre në shtator të vitit 2020, zyrtarisht rifilloi. Takimi i parë tregoi se palët kishin dallime të mëdha, megjithatë Kurti dhe Vuçiç ishin dakord të vazhdojnë takimet. Sipas zëdhënësit të BE, Peter Stano, bisedimet midis Kryeministrit të Kosovës, Albin Kurti dhe Presidentit të Serbisë, Aleksandar Vuçiç, do të përqendrohen në përparimin e arritur si dhe për hapat e mëtejmë në procesin e dialogut.
