Ministri Vitia: 99% e rasteve me Delta, ja masat e reja…

Ministri i Shëndetësisë, Arben Vitia pas mbledhje së Qeverisë së Kosovës tha se gati në 99 për qind të rasteve të reja të infektuara me COVID-19 është prezent varianti Delta. Në këtë situatë, Qeveria e Kosovës sot ka miratuar masat e reja Anticovid, të cilat do të hyjnë në fuqi nga dita e premte, më 20 gusht.

“Varianti Delta siç e kemi përmendur mbrëmë, tani është konfirmuar gati në 99 për qind e rasteve të reja. Ka kohë që ne kemi paralajmëruar se një valë e re e pandemisë me këtë variant është e pashmangshme. Gjatë gjithë kohës ne e kemi ditur se vetëm vaksinimi mund të ngadalësoj dhe mund të ndaloj këtë valë. Prandaj i kemi shtuar kapacitetet e vaksinimit dhe brenda një periudhe relativisht të shkurtër kemi arritur të administrojmë gati 650 mijë vaksina duke përfshirë edhe ato që po bëhen sot. Kapacitetet në spitalet tona janë të kufizuara dhe ne po e përsëris, në situatën aktuale jemi të detyruar të ndërmarrim masa që vënë në pah mbi të gjitha shëndetin publik të qytetarëve të republikës,” tha Vitia duke shtuar se numri i të vaksinuarve nuk është i mjaftueshëm për të ndalur hovin e variantit Delta, andaj ai ka kërkuar nga qytetarët që të vaksinohen.

“Me variantin Delta as ky numër nuk mjafton që të ndalim hovin e këtij virusi. Na duhen më shumë caktime të termineve dhe vaksinime në mënyrë që të parandalojmë sa më shpejtë shpërndarjen e virusi. Me këtë variant, për shkak të përhapjes shumë të shpejtë, shtimi i numrit të të infektuarve me këtë rritje tani për ilustrim vetëm dy javë pas situatës që ishim me 200 raste, ky numër sot është dhjetëfishuar,” tha Ministri i Shëndetësisë, Arben Vitia, duke dëshmuar se sa i frikshëm është varianti Delta.

Ministri i Shëndetësisë, Arben Vitia, tha se masat e reja Anticovid që u miratuan sot kanë për qëllim kontrollin dhe parandalimin e shpërndarjes së COVID-19.

“Masat e këtij propozimvendimi, nuk përcaktojnë në asnjë rast obligimin e vaksinimit të detyrueshëm, duke qenë se kufizimet e vendosura ndaj publikut mund të përmbushen me paraqitjen e dëshmisë së statusit të vaksinimit, të rezultatit të një testimi që arrin në përfundimin se personi nuk është i infektuar, apo që është i shëruar nga COVID-19 dhe ka antitrupa të mjaftueshëm për ta luftuar sëmundjen,” tha Vitia duke sqaruar se nga data 20 gusht do të mbyllen klubet e natës si dhe ndalohet organizimi i dasmave. Një masë tjetër është shkurtimi i orarit të punës deri në 22:30 për bizneset e gastronomisë, pasi që vendimi të publikohet në Gazetën Zyrtare. Në bazë të vendimit të ri qytetarëve nga vendet me rrezikshmëri të lartë, përfshirë qytetarët e vendit që vijnë nga ato vende do t’iu kërkohet testi negativ, certifikata e vaksinimit ose testi serologjik. Ministri nuk bëri të ditur se cilat vende janë të përfshira në listën e vendeve me rrezikshmëri të lartë por saktësoi se masat do të vlejnë deri më 1 shtator pasi varianti Delta e bën të paparashikueshme situatën, e detajet e këtij vendimi, tha ai, do të publikohen ndërkohë.

Ndryshe, Kryetari i Odës së Hotelerisë dhe Turizmit, Hysen Sogojeva, dje ka sqaruar se nga data 20 gusht, deri më 1 shtator, orari i gastronomisë do të jetë deri në orën 22:30 apo eventualisht deri në orën 23:00.

“Nga data 20 deri më 1 shtator orari i gastronomisë do të jetë deri në 22:30 ose deri në orën 23:00. Sallat e dasmave, hotelet, restorantet, qendrat tregtare dhe restorantet brenda tyre po ashtu. Maksimumi i personave të lejuar në dasma do të jetë 150,” tha Sogojeva duke saktësuar se në dasma do të kërkohet dëshmia e vaksinës, apo testi negativ i COVID-19. Ndërsa klubet e natës, sipas tij, do të mbyllen, derisa tha se nuk është përmendur kufizimi i lëvizjes së qytetarëve.

“Klubet e natës mbyllen nga data 20. Kufizimi i lëvizjes nuk është përmendur.  Ne si Odë duke e parë gjendjen, u pajtuam me këto masa deri më 1 shtator,” tha Sogojeva.

Ndërkaq Asociacioni i Komunave të Kosovës përmes një postimi në Facebook, ka deklaruar se kryetarët e komunave kanë propozuar mbylljen e klubeve të natës, lejimin e dasmave me vetëm 150 persona me dëshmi të vaksinimit ose me test PCR negativ apo serologjik.

“Në respektim të masave do të duhet të shtohen rastet e inspektimeve nga niveli qendror dhe në bashkëpunim me inspektorët komunalë që të jenë edhe në një fushatë ndërgjegjësimi sidomos në gastronomi që të zvogëlojmë shkallën e infektimeve.”

Në këtë takim, gjithashtu është marrë vendim që qendrat e vaksinimit të punojnë edhe të shtunën.

“Ministri Vitia tha në fund se tash në Qendrat e Vaksionimit do të punohet edhe të shtuneve ndërsa sa i përket barnave esenciale kemi marrë gjitha masat por janë 200 aktivitete të prokurimit dhe nuk mund të përshpejtojmë për shkak procedurave,” thuhet në njoftimin e Asociacionit të Komunave të Kosovës .