Rënie e madhe e çmimit të naftës
Çmimi i naftës në tregun global ka pësuar rënie gjatë javës së kaluar, nivel ky më i lartë në 9 muajt e fundit sepse tregtarët për shkak të valës së re së përhapjes së COVID-19 po shesin sasitë që kanë kontraktuar në pritje të uljes së kërkesës në gjithë botën.
Çmimi i barelit Brent në bursën londineze ka pësuar rënie të madhe gjatë javës së kaluar deri në 8 për qind, në 65.18 dollarë, nivel ky më u ulët që nga muaji prill. Në tregun amerikan bareli WTI i naftës ka rënë 9 për qind, me 62.32 dollarë, nivel ky më i ulët që nga shtatori i vitit të kaluar.
Ditën e premte, çmimi i naftës ka shënuar rënie të pandërprerë edhe në ditën e shtatë tregtare me radhë pasi që gjithnjë e më shumë shtete po përballen me rritjen e numrit të infektuarëve me COVID-19, arsye që kufizon dhe udhëtimet në përpjekje për të parandaluar përhapjen e pandemisë.
Kina aplikon masa të rrepta dezinfektimi në porte
Kina ka vendosur masa të rrepta të dezinfektimit në porte, duke shkaktuar ngecje të qarkullimit të mallërave, dhe ashtu si SHBA aplikon kufizimin e numrit të udhëtarëve në linjat ajrore. Shumë shtete tjera, ndër të cilat edhe Australia, kanë kufizuar udhëtimet e qytetarëve. Për këtë arsye kërkesa e karburantit për avionë ka pësuar rënie, pas një rritje të madhe që kishte gjatë gjithë verës.
“Me këtë lloj paparashikueshmërie, është vështirë të gjendet një pikë ku çmimi i naftës mund të rezistoj. Qeveritë veprojnë ashpër për të minimizuar përhapjen e infeksionit, e kjo kërcënon drejtëpërdrejtë çmimin e naftës,” thekson John Kilduff, partner në Again Capital LLP.
Ndërkohë dollari ka pësuar rritje gjatë javës së kaluar në krahasim me gjashtë valutat më të rëndësishme në botë, në nivelin më të lartë në nëntë muajt e fundit, sepse FED po shqyrton uljen e nxitjes monetare. Gjithsesi, çmimi i naftës është në korelacion të kundërt me kursin e dollarit dhe kur valuta amerikane rritet, për blerësit nafta është më e shtrenjtë.
Delta presion mbi kërkesën, oferta rritet
Dhe deri sa varianti Delta i koronavirusit bënë presion mbi kërkesën, oferta e naftës vazhdon të rritet. Prodhimi amerikan është rritur edhe javën e kaluar me 11.4 milionë barel në ditë, ndërsa ka shënuar rritje edhe numri i puseve që po hapen për të tretën javë me radhë, tregojnë të dhënat e kompanisë Baker Hughes. Edhe OPEC ka rritur ofertën e saj. Për këtë arsye kanë filluar të bijnë edhe çmimet e kontratave të rregullta, përkatëssisht kontratave për furnizim me naftë në muajt e ardhshëm, që sugjeron që tregtarët presin ofertën e mirë në tregun e naftës në muajt e ardhshëm.
