Mohoi Masakrën e Reçakut, BE e mbron: Gjykata e Kosovës nuk ka respektuar Marrëveshjen e Brukselit!

Pasi Gjykata e Apelit konfirmoi dënimin me dy vjet burg për shkak të deklaratave fyese për Masakrën e Reçakut nga deputeti serb, Ivan Todosijeviç, dhe Presidenti i Serbisë, Aleksandar Vuçiç reagoi duke thënë se ai u dënua sepse tha të vërtetën ndërsa i bëri thirrje BE të reagoi, kjo e fundit përmes Zëdhënësit të Bashkimit Europian, Peter Stano, i dha të drejtë dy kriminelëve serbë duke thënë se gjykata e Kosovës nuk ka respektuar Marrëveshjen që u arrit në Bruksel në vitin 2013, në rastin e Ivan Todosijeviçit.

“Marrëveshja është arritur që Gjykata e Apelit në Prishtinë të caktojë një panel të përbërë nga gjyqtarë kryesisht serbë në rastin e gjykimeve brenda komunave me shumicë serbe. Në këtë rast nuk u respektua,” tha Peter Stano për Agjencinë shtetërore serbe të lajmeve Tanjug.

Ndryshe, deputeti i Parlamentit të Kosovës ka deklaruar se Masakra e Reçakut është trillim dhe se “terroristët shqiptarë e trilluan gjithë këtë dhe bënë krimet më të mëdha në Kosovë dhe Metohi”. Gjykata e Apelit ka konfirmuar dënimin e Todosijeviçit me dy vjet burg dhe pritet t’i merret mandati i deputetit.

Ndaj konfirmimit të dënimit ka reaguar Lista Srpska duke thënë se do të shqyrtojë mundësinë që të mos merr pjesë në zgjedhjet lokale më 17 tetor, ndërsa kryetarët e komunave veriore kanë thënë se pas kësaj situate nuk e dinë nëse është e mundur të mbahen zgjedhjet lokale në veri.

Sipas Listës Srpska është shkelur Marrëveshja e Brukselit pasi në gjykim ishin prezentë vetëm gjykatës shqiptarë, e jo sipas marrëveshjes për raste të tilla është dashur që gjykatësit serbë të jenëshumicë.