BE, dialogu Kosovë-Serbi vazhdon me 7 dhe 8 Shtator

Delegacionet e Kosovës dhe Serbisë pritet të takohen në Bruksel më 7 dhe 8 shtator, në kuadër të dialogut për normalizimin e marrëdhënieve, të cilin po e lehtëson Bashkimi Evropian.

Delegacionin e Kosovës do ta kryesojë Zv/Kryeministri i parë, Besnik Bislimi, ndërsa atë të Serbisë drejtori i Zyrës për Kosovën në Qeverinë e Serbisë, Petar Petkoviç. I dërguari i posaçëm i BE-së për dialogun, Mirosllav Lajçak, ka biseduar përmes telefonit me të dy kryenegociatorët pikërisht për të përgatitur takimin e tyre të radhës, raporton RFE.

“Pata diskutime përmbajtjesore, të ndara, me Zv/Kryeministrin e parë të Kosovës, Besnik Bislimi, dhe me drejtorin e Zyrës së Serbisë për Kosovën, Petar Petkoviç, rreth përgatitjeve për takimin e radhës në nivel të kryenegociatorëve,” thekson Lajçak përmes rrjetit social Twitter.

Takimi i delegacioneve të Kosovës dhe Serbisë pritet të shërbejë edhe për të përgatitur një takim në nivël të lartë midis Kryeministrit të Kosovës, Albin Kurti, dhe Presidentit të Serbisë, Aleksandar Vuçiç.

Edhe ky takim pritet të zhvillohet gjatë muajt shtator, por data për të nuk është caktuar ende.

Takimi i fundit në nivel të lartë është zhvilluar më 19 korrik, por ai nuk ka prodhuar asnjë rezultat konkret.

Takimin e konfirmuan burimet diplomatike në Bruksel, duke thënë se agjenda e bisedimeve nuk është caktuar ende.

Takimi pritet të jetë në nivel të shefave të ekipeve negociuese.