FIFA dënon Trajnerin, Federatën e Serbisë dhe Presidentin e saj. Ja vendimi…
Komisioni disciplinor i FIFA ka dënuar Trajnerin, Federatën e Futbollit të Serbisë dhe Presidentin e saj me 64.000 franga zvicerane.
Presidenti i Federatës së Futbollit të Serbisë, Sllavisha Kokez dhe trajneri Mlladen Krstajiç, sipas vendimit të FIFA, gjobiten me nga 5.000 franga ndërsa Federata e Futbollit e Serbisë me 54.000 franga zvicerane.
Njeriu i parë i Federatës serbe, Kokez dhe trajneri Krstajiç u dënuan nga FIFA për shkak të komenteve publike që i bënë lidhur me gjykimin e arbitrit, Felix Brych.
Kokez pas ndeshjes deklaroi se arbitri gjerman ka dëmtuar rëndë ekipin serb ndërsa Krstajiç tha se për këtë gjykim, arbitrin do ta çonte në Hagë.
Ndërkohë Federata e Serbisë u dënua me 54.000 franga zvicerane për shkak të mesazheve diskriminuese të tifozëve serbë dhe hedhjes së gjërave të ndryshme gjatë ndeshjes në Kalinjingrad. Në këtë ndeshje të Grupit E, Serbia pësoi humbje nga Zvicra me rezultat 2:1.
