Kush e ka radhën?! Duke pritur Godolen!
PD duhet të ndahet nga Berisha! Lajmi ishte jo i zakonshëm për faqen e parë të gazetës zyrtare të PD, “Rilindja Demorkatike” dhe tronditës kur doli nga goja e një Sekretareje të emëruar për të Përndjekurit Politik, e cila menjëherë angazhohet për largimin e liderit historik nga Partia Demokratike!
Me kalimin e orëve dhe shpalljen e vendimit nga Kryetari i PD, Lulzim Basha, për ta përjashtuar liderin historik Sali Berisha nga Grupi Parlamentar, tashmë ishte e qartë se komunistët asgjë nuk i lënë rastësisë: as “dërgimin” e bijes së tyre për të qenë pjesë e drejtimit të Institutit të Studimit të Krimeve dhe Pasojave të Komunizmit, as futjes në radhët e demokratëve për menaxhuar të përndjekurit politik, as edhe shfaqjes me deklaratën e saj si zyrtare e Partisë Demokratike për domosdoshmërinë e ndarjes së PD nga Berisha!
Berishën e largoi Kryetari, po kush e ka radhën, presin me ankth kupola e Partisë Demokratike daljen e radhës, jo të Kryetarit Lulzim Basha, por, të Jonila Godoles, drejtimi i gishtit të së cilës paralajmëron fermanin për ata që nuk kanë vend më në PD, që më nuk po kuptohet e kujt është, por, e lirisë, Jo!
25 vjet luftë
Në kronologjinë e rrënimit të Sali Berishës nga komunistët deri në shpalljen NON GRATA nga Departamenti i Shtetit dhe përjashtimit nga Grupi Parlamentar, vend të rëndësishëm zë, siç e ka merak ta etiketojë propaganda komuniste, studiuesja, pedagogia, gazetarja, Jonila Godole, e cila një ditë të bukur gushti ja behu në selinë e PD, hiq më pak se Sekretare për të përndjekurit politik!
Kush ishte kjo, pyesnin të gjithë, e shumë shpejtë u bë e qartë se as vetë Kryetari Lulzim Basha si propozues nuk e njehë. Përmbytjes me hamendësime në rrjetet sociale, e përzgjedhura e Bashës për të drejtuar një Sekretari të re dhe shumë të qëlluar për këtë parti, iu përgjigj përmes një interviste në News 24:
“Nuk do më dukej e logjikshme të më kërkonte mua mendim PS, kur nuk ka pasur asnjëherë interes për këtë kauzë. PD, me gjithë gabimet që mund të ketë bërë, ka ish të përndjekur politikë si trupin më të fortë të votuesve, ndaj m’u duk normale që ata të vinin tek unë dhe jo PS. Unë kam qenë e goditur, e anatemuar nga PS në këtë fushë,“ tha Jonila Godole ndonëse gjithçka që ka arritur në jetën e saj e ka fal shërbimit që i ka bërë Partisë Socialiste dhe luftës së pakursyer kundër Sali Berishës, dhe sot thotë se ishte e goditur nga kjo parti kriminale.
Por Jonila Godole nuk ka faj! Partia Demokratike nuk është në këtë ditë të hallit kot, kur jo vetëm që harron shkrimet kriminale të gazetës “Koha Jonë” kundër saj dhe liderit historik, autorët e këtyre shkrimeve por dhe njerëzit që së fundi votohen në parlament nga Partia Socialiste për të kriminalizuar PD-në dhe Institutin e Studimit të Krimeve dhe Pasojave të Komunizmit, duke i zënë vend edhe demokratëve që familjen dhe jetën e tyre e dhanë për këtë kauzë; Njëra ndër to është Jonila Godole!
Godole u votua nga Partia Socialiste në Komisionin e Ligjeve nëntorin e vitit 2017 dhe në Parlament 3 muaj më vonë, jo për merita të veçanta por vetëm pse ishte bijë e një oficeri komunist, që për idealin e partisë ishte sprovuar. Lideri i PD, Lulzim Basha, ndoshta nuk do t’ia dijë, por kur ajo u votua në Komisionin e Ligjeve përballë kishte Kryetarin aktual të Shoqatës Antikomuniste të të Përndjekurëve Politik, Nebil Çika, dhe Ish-Kryetarin e kësaj Shoqate, Simon Mirakaj. Dhe, sot, ajo jo vetëm që është anëtare e bordit të Institutit të Studimit të Krimeve dhe Pasojave të Komunizmit por dhe Sekretare e të Përndjekurëve Politik në PD, vetëm pse i shërbeu Partisë Socialiste. Dhe, jo pak!
Në ofensivën që filloi Partia Socialiste për rrëzimin e Sali Berishës dhe rikthimin e komunizmit në vitin 1996, Jonila Godole ishte në radhët e para. Si autore shkrimeve në gazetën “Koha Jonë” ajo dëshmoi jo vetëm zellin që ka kundër demokracisë por dhe urrejtjen ndaj liderit të saj, Sali Berisha.
Kur është fjala tek përndjekurit politik, Godole e bënë një shkrim të gjatë më 29 Nëntor të vitit 1996 me titull “Berisha ‘ndjek’ të përndjekurit” ku flet për unifikimin e 28 dhe 29 nëntorin dhe ndërsa rrëzohet teza e Pjetër Arbnorit në kujtimet e tij se Shkodra u çlirua më 28 nëntor 1944, PS me Paskal Milon konfirmojnë datën 29 Nëntor duke sjellë dëshminë e bashkëfshatarit të Pjetrit që jeton në SHBA, Nik Stajka se Shkodra u çlirua më 29 nëntor 1944.
“Presidentit Berisha i duhej të bënte një kompromis brenda PD për ta mbajtur atë të unifikuar, por i duhej gjithashtu që për konsum të jashtëm të jepte një shfaqje të anikomunizmit brutal,” citohet Paskal Milo në shkrim edhe më 29 Nëntor 1996 kur lufta me ditën e çlirimit ishte në kulmin e saj nga siç thotë Godole “…burrat me ideal të përbashkët, justifikues për pjesëmarrjen e djeshme, që jepnin e merrnin te varri i Vasil Shantos, afër Nënës Shqipëri…”
Mos është ky pengu që kishte Godole për të përndjekurit që i “ndjek” Berisha dhe ia behu në PD?! Jo, se ka shumë meraqe të tjera për njeriun të cilin Godole para zgjedhjeve të 26 Majit raporton qartë se ka frikë nga socialistët ndërsa në muajin gusht, kur një gjë e tillë nuk ndodhë, ajo e sheh të sëmurë edhe kur një plagë i shfaqet rreth buzëve.
Po kush ishin ata prej të cilëve, sipas Godoles, Sali Berisha kishte frikë dhe Komisioni i Kontrollit të figurave i kishte eliminuar nga jeta politike. Mos qeshni ose më saktë mos u gajasni, sepse vetëm më 19 Prill 1996 Presidenti Berisha kishte filluar të bënte gjumë të qetë pasi Servet Pëllumbi, Fatos Muça e Emin Mysliu ishin “djegur”.
As tempora as mores, por një idiotizëm “par excellence” që vetëm propaganda komuniste mund ta hedhë në letër, e pak rëndësi ka nëse është ose jo autore Jonila Godole. Por, ja që është autore e këtyre rreshtave:
“Duket se Berisha nuk mund të ta harrojë atë natë të prishjes së qeverisë më potente të Shqipërisë në historinë e saj dhe njëkohësisht kundër ish-kryetarit të partisë, Sali Berisha, i cili përkundër paktit me anëtarët e partisë së tij në qeveri, kërkonte me ngulm prishjen e qeverisë,” akuzonte Berishën, Godole, për Emin Mysliun që na paska qenë njeriu i cili përkrah presidentit të sotëm, katër vjet më parë punonte me ngulm për të filluar ndërtimin e demokracisë së vërtetë, dhe tani na ishte bërë viktimë e Komisionit për Kontrollin e figurave.
E Sali Berisha që kishte frikë nga Servet Pëllumbi dhe Emin Mysliu, sapo i pa këta në Sheshin Skënderbej, ngordhi! Mori Dajtin përpjetë! Apo, siç raporton Godole më 30 Maj, na qenka “Komunist-Diktator” sepse përdori dhunë dhe terror mbi politikanët dhe njerëzit e thjeshtë.
“Masakra e ditës së martë në sheshin Skënderbej kundër opozitës, e organizuar që nga Presidenti deri tek krimineli më analfabet, që qëlloi dje pensionistët dhe fëmijët, të cilët kërkuan të protestojnë në mënyrë paqësore kundër zgjedhjeve të manipuluara të 26 majit, është një akuzë e rëndë dhe publike, jo vetëm brenda por edhe jashtë vendit,” citon Ilir Metën e PS, autorja e shkrimit ndërsa nuk e sheh të rrugës të pyes palën akuzuese por sërish vazhdon me akuza, kësaj radhe me Paskal Milon:
“Berisha, ky komunist-diktator, vendosi ta rikthejë Shqipërinë përfundimisht 50 vjet prapa me një dallim nga diktatori i mëparshëm, nëse ai i bënte vrasjet natën, ky i bën në mes të ditës.”
Dhe, ndonëse u akuzua për zgjedhje të manipuluara nga opozita, nga Jonila Godole, ekipi dhe mënyra e qeverisjes duket se nuk do të ndryshoj, dhe Sali Berisha do ta zvarris pas vetes edhe Qeverinë, edhe partinë, edhe Parlamentin.
“Dy ditë pas paraqitjes së dorëheqjes, Meksi ka qenë ‘i detyruar’ të pranojë të njejtën karrige edhe për 1460 ditë të tjera (sipas llogaritjeve të Presidentit)?!” thekson Jonila Godole pas emërimeve të reja të kreut të qeverisë dhe parlamentit, në shkrimin e saj më 2 Korrik 1996 me titull aktual deri ditën kur ajo shkeli në PD: Qeveria “Meksi” me kokën e Berishës!
Tani kur Godole shkeli në selinë e Partisë Demokratike, nuk dihet nëse ishte e “detyruar” të pranojë karrigen, sikurse Meksi, ama me vendimin për përjashtimin e Sali Berishës, e konfirmoi se Luli nuk e ka drejtuar PD-në me kokën e Berishës ashtu siç pretendohej nga viti 2013!
Por propaganda komuniste nuk u ndal vetëm me arsyetimin e veprimeve të Meksit dhe akuzave ndaj Berishës, e vendosur që kët njeri ta rrëzoj me çdo mjet. U përdor dhe arma propagandistike më ordinere që përdorin komunistët për rivalët e tyre politik, sëmundja, dhe kjo iu besua Jonida Godoles.
“Sali Berisha i sëmurë!” është alarmi që ngre ajo më 11 gusht të vitit 1996 për demokratët, kohë kur socialistët nuk e hiqnin dot Doktorin nga PD aq lehtë, pikërisht si sot. Dhe shpikja ishte shumë e madhe, më e madhe se sa një sy i hollë gazetaresk.
“Disa plagë poshtë hundës dhe rreth gojës vënë në dyshim shëndetin e Presidentit Berisha ndërsa mjekët thonë se shkaqet mund të jenë gripi, alergjia, mungesa e imunitetit, sëmundje gjaku etj.” thotë Godole duke ngrit dyshime për Presidentin pasi, siç thotë ajo, ka kohë që u fshihet njerëzve, nuk del më në shetitje pa makinë, nuk del më pa shoqërinë e bashkëshortes.
“Vetë First Lady shqiptar nga burime të brendshme të familjes mësohet t’i ketë kërkuar shpesh dorëheqjen nga posti, por Presidenti këtë propozim e ka kundërshtuar gjithnjë me forcë. Shoqëruesit e zotit President tregojnë të shqetësuar se ai nuk mund të ecë dot gjatë në këmbë pa i patur rojet pranë, të cilët e ndihmojnë në çdo rast rrëzimi, madje edhe në tapetet pa pengesa të Presidencës,” thekson Godole duke shprehur dëshirat e militantëve komunist ndonëse i ka hedhur në gazetë si fakte, por nuk mjaftohet me kaq, pa e shprehur dëshirën që ta shoh Saliun përtoke:
“Gjatë turneut nëpër Shqipëri në fushatën e fundit elektorale, shenjat e sëmundjes së tij janë bërë të dallueshme edhe për njerëzit e thjeshtë, të cilët e kanë parë Presidentin e tyre jo pak herë përtokë. Tension, dhimbje koke, humbje ekuilibri, acarim nervash deri në humbje të vetëkontrollit, shfaqje të sklerozës etj, përcaktohet ‘kartela’ shëndetësore sipas shoqëruesve të njëshit shqiptar,” shkruan Jonila Godole duke sjell fakte për “Sali Berishën e sëmurë” ndërsa shton se pamja e tij e lodhur apo përsëritja disa herë e të njëjtit mendim nëpër mbledhjet dhe kuvendet e PD, nuk ka shumë nevojë për koment.
Jo vetëm ky fakt që sjell Godole por i gjithë shkrimi nuk do koment sepse është jashtëzakonisht ordiner, e Sali Berisha, të cilit i dedikohet shkrimi, kështu “i sëmurë” vazhdoi edhe një 25 vjet për tu bërë makth jo vetëm i Jonila Godoles, por është vetëm ajo që u detyrua të luftojë duke u futur në Partinë Demokratike me rreth 20 mijë të përndjekur politik, ti drejtoi ata ndonëse nuk ka lidhje me PD dhe nga ana tjetër vjen nga një familje komuniste që ka prodhuar të përndjekur politik antikomunist!
Dhe vjen viti i zi 1997! Shumë shkrime “alla godole” nga ky vit, jo vetëm te “Koha Jonë”, janë për Gjykatën e Hagës, por urrejtja e shprehur në ekstrem ndaj atyre që nuk janë komunist dhe keqpërdorimi i misionit të gazetarit për këtë qëllim, mbanë shumë pak firma individuale. Nga vinte i gjithë ky guxim, këtë e dëshmon edhe fakti se ky personalitet shkon dhe deri në Partinë Demokratike që e ka akuzuar për 25 vjet, vetëm e vetëm për ta rrënuar Sali Berishën.
Për të kuptuar se cili ishte niveli i shkrimeve të Godoles kundër Sali Berishës e ilustron më së miri ai i 31 Janarit 1997 me titull “Tiranë, ushtarët vishen si policë”.
Sikur çdo germë që shkruan Godole të ishte e vërtetë, se sa ishin të rrezikuar ushtarët që janë veshur policë, vetëm për të dëmtuar Sali Berishën, dëshmojnë çmendurinë që kishte pllakosur një shtresë të njerëzve që më nuk mund kthehen në realitet sa të jetë jeta.
“Nuk janë më të pasur se të tjerët, përkundrazi. Megjithatë, ata bëjnë detyrën siç do ta kishin bërë gjithmonë, aty ku do t’i thërriste atdheu. Parlamenti, pas urdhrit të presidentit, i ka vënë në gatishmëri. Thuhet se po pritet 5 shkurti, madje vetë ushtarët me veshjet e tyre ku mbizotërojnë gjethet e rëna, mezi po prisnin. Vetëm dje vendi i tyre ishte pak më i spostuar se ditë më parë. Jeshilët kanë ndërruar uniformat në blu, ky është ndryshimi më i madh,” shkruan Godole duke ilustruar edhe me tabelë vendet ku Presidenti thirri ushtrinë për ta vendosur rregullin pas konfrontimeve të protestuesve me policinë dhe shkatërrimeve në jug të vendit.
Më 20 Shkurt 1997, Jonila Godole shkruan për aktualitetin, ndalimin e prodhimit dhe shitjes së armëve pa leje, qofshin dhe artizanale. Vërtetë dy Artanët, Lame dhe Shkreli, nuk ishin në atë kohë dhe as që do të shkonin deri në këtë pikë, por “investiguesja” Godole po kërkonte se ku i gjeti Berisha armët antike.
Shqiptarët kur panë se si përdhoset vizita e Presidentit Bush në Fushë Krujë me “vjedhjen e orës së presidentit” menduan se ndodhi hataja. Por, jo, ishte vetëm hataja e radhës, e njëra nga këto hata ishte dhe shkrimi i Godoles mbi sendet antike që Berisha i kishte dhuruar Mbretëreshës së Anglisë, kryeministrit dhe ministrave. Ashtu si në rastin e orës së Bushit, edhe në këtë rast u gjet një Myslim i Islamajve që kishte qenë Drejtor i Muzeut Kombëtar, për të pohuar për mediat britanike se këto dhurata janë marrë nga Muzeu.
Dhe deri sa Berisha vazhdoi të thotë se sendet antike nuk i ka marrë në Muze por nga prodhues që gjenden me shumicë në Krujë, Shkodër e qytete tjera, për Godolen, emërtimi “artizanale” që Berisha iu bënë armëve, shpatë e kobure, respektivisht dhurata për Sekretarin e Shtetit Herd dhe Kryeministrin John Major, bie ndesh me Kodin Penal shqiptar.
Por viti i zi 1997 ka dhe shumë shkrime të zeza, njëri prej të cilëve aq i zi vetëm për të akuzuar regjimin e Berishës: “Hemoragji prej plumbave”.
Jonila Godole shkruan për spitale të mbushura plot, qindra jetë më pak për Shqipërinë, mijëra të plagosur, qindra fëmijë të humbur e të gjymtuar, por ku janë shifrat dhe burimet zyrtare.
“Eksod të tillë nuk ka parë ndonjëherë Shqipëria. Mbi 13 mijë njerëz të larguar me det drejt Italisë, iu shtohen qindra e qindra të tjerë të gjymtuar e të përcjellë për banesën e fundit në tokën e tyre. Shifrat zyrtare flasin për 206 jetë të humbura dhe mbi 700 të plagosur,” thekson Godole duke venë menjëherë në pikëpyetje shifrën zyrtare ndërsa i referohet zërave që qarkullojnë korridoreve të spitaleve që flasin për më s humb se 500 të vdekur dhe mijëra të plagosur. Por nuk ndalon as në korridoret e spitaleve por shton se ekzistojnë tjera zëra që flasin për mbi një mijë jetë të humbura, dhe mijëra trupa të plagosur, shumë prej tyre të gjymtuar për tërë jetën.
Pra, eksod më të madh nuk kishte parë ndonjëherë Jonila Godole sepse Shqipëria po, vetëm 6 vjet para se të shkruhej ky shkrim i 13 Prillit 1997, e sa për foshnje të vrara, këtë e ka arritur edhe Lulzim Basha ta shoh me Griseldën, që komunistët e partisë godolase i bëjnë të vdekur sa herë nuk janë në pushtet.
Sot, besojë askush më nuk do të jetë më i paqartë pse dhe si erdhi Jonila Godole në PD si Sekretare e të Përndjekurëve Politik; Ose më sakt si Sekretare e Sindromit të Stockholmit, sepse vetëm të përndjekur politikë që komunistët i kanë degdisur deri në atë gjendje, mund të pranojnë ti drejtojë bija e një oficeri komunist dhe propaganduesja e politikës kriminale të Partisë Socialiste.
Dhe, askush nga lidershipi i Partisë Demokratike nuk do të ketë më frikë nga Kryetari i PD por nga një Sekretare që ai e përzgjodhi ose më saktë i përzgjodhën për të spastruar radhët nga ata që edhe sot e duan ATDHEUN!
vijon: Sekretarja për Organizatat Partnere, shefe e Albanës dhe Belindit!
