Instituti i Shëndetit Publik rekomandon shtyrjen e zgjedhjeve lokale në Kosovë

Instituti Kombëtar i Shëndetësisë Publike të Kosovës, IKSHPK, ka dhënë vlerësimin në lidhje me ndikimin e procesit zgjedhor në gjendjen epidemiologjike në vend, përmes një letre drejtuar Presidentes Vjosa Osmanit, duke rekomanduar shtyrjen e zgjedhjeve lokale.

“Rekomandojmë shtyrjen e procesit zgjedhor, përkatësisht ndalimin e aktiviteteve publike, grumbullimet e qytetarëve dhe tubimet publike të të gjitha llojeve dhe natyrave pa përjashtim, deri në vlerësimin epidemiologjik të radhës,” thuhet në letrën që IKSHPK i ka dërguar Presidentes Vjosa Osmani.

Presidentja Osmani ka reaguar menjëherë duke ftuar partitë politike në një takim konsultativ për këtë çështje për të hënën në ora 16:30.

Ndërkohë partitë opozitare janë shprehur kundër shtyrjes së zgjedhjeve lokale, duke akuzuar partinë në pushtet për ikje nga përballja me qytetarin.