Nga 1 Tetori, Kurti: Arsimi publik në Bachelor dhe Master pa pagesë

Kryeministri i Kosovës, Albin Kurti, ka bërë të ditur sot se duke filluar nga viti akademik 2021/22, 1 Tetor, arsimi publik në nivelin Bachelor dhe Master do të jetë pa pagesë, ndërsa në studimet  e Doktoraturës  do të ketë lehtësime.

“Nga 1 tetori i këtij viti, duke filluar nga vitit akademik 2021/22 arsimi i lartë publik do të jetë pa pagesë për të gjithë ata që dëshirojnë të studiojnë në nivelin Bachelor dhe Master. Ndërsa, për studentët e doktoraturës do të ketë lehtësime të veçanta,” tha Kryeministri Albin Kurti sot në një dalje publike me ministren e Arsimit, Arbërie Nagavci.

Ndryshe, në universitetet publike në Kosovë, studentët e nivelit Bachelor deri më tani kanë paguar 25 euro për semestër, përveç vitit të parë të studimeve që ka qenë falas; Semestri për nivelin Master studentit kosovar i ka kushtuar 150 euro ndërsa për doktoraturë 500 euro.