Betohet “Rama 3”, pas 8 vjetësh Edi Rama kërkon nga ministrat etikë, ja 4 vendimet e para

“Betohem në nderin tim, se do të zbatoj me përpikëri Kushtetutën dhe ligjet, si dhe do të kryej me përgjegjësi detyrën shumë të rëndësishme që më është besuar, të kryetarit të Këshillit të Ministrave!” Kështu Kryeministri Edi Rama o zotua duke shkelur në mandatin e tij të tretë qeverisës me kabinetin e ri “Rama 3” pas tetë vjet shkeljesh me përpikëri të Kushtetutës dhe ligjeve pa dëshmuar ai dhe jo vetëm, nëse kishin nder. Gjithsesi, propagandën e kanë!

Dolën nga Presidenca, ndaluan në semafor si gjithmonë me popullin për t’iu drejtuar Kryeministrisë, aty ku fillon dhe ku mbaron kujdesi për popullin shqiptar, i cili ka gjetë dhe zgjidhjen ndonëse shumë të dhimbshme, largohet pa u kthyer kjo qeveri në semaforin e radhës! Pse?!

Që populli ka të drejtë u pa që në mbledhjen e parë ku Kryeministri i kërkoi ministrave të rinj respektimin e Kodit Etik dhe më në fund e nxori nga goja, se ata që ishin e kishin shkelur. Por, gjatë këtij mandati, u zotua Rama, nëse evidentohen shkelje të Kodit Etik nga ana e ministrave, ata duhet të kërkojnë falje publike, e nëse shkelja përsëritet duhet të japin dorëheqje.

“Duam të ndajmë me opinionin publik këtë nisje zyrtare. Çdo anëtar i kabinetit duhet të zotohet këtu publikisht në respektimin në frymë dhe germë të Kodit Etik, duke marrë kështu përgjegjësinë. Kodi Etik është miratuar si një dokument parimesh që përcaktojnë vijnë e sjelljes së anëtarëve të qeverisë. Unë do të shënojë disa pika kyçe të thëna në dokumentin e miratuar. Fjala që do të dëgjoni është rrjedhojë e eksperiencës. Qytetarët na kanë besuar shërbimin e vendit. Aty nuk shkruhet që; as që anëtarët e qeverisë të udhëtojnë me business class, apo të shkojnë në udhëtime jashtë vendit, apo të pinë kafe. Apo për dreka dhe darka. Këtu se kam fjalën kur ministrat janë jashtë me punë. Për dy të parat, për udhëtimet dhe pushimet janë zbatuar. Kohë më parë politikanët shulleheshin me pushime jashtë. Do përcaktuar në aneksin e Kodit Etik se bashkëshortët e anëtarëve të kabinetit, s’mund të përdorin sallën e vipave në aeroportin e Rinasit. Po ashtu ndalohet dhe përdorimi i makinës së ministrit nga familjarët. Për fat të keq ‘pirja e kafeve’, nuk është zbatuar. Të gjithë qytetarët duhet ta dinë, Qeveria ka një Kod Etik,” tha Edi Rama jo për merakun që kishte për opinionin publik por nuk kishte asgjë tjetër përveç se këtij Kodi Etik, edhe pse shqiptarët e njohin këtë njeri cili u betua sot për Kryeministër që nuk ka lidhje as me respektim ligji, as etike e aq më pak me ndershmërie që shkon deri te shtetërorja.

“Ndaj dua ta bëj me dije se në rastin e parë të mosrepsketimit të Kodit Etik, ministri përgjegjës të kërkojë ndjesë publike dhe në rast të përsëritur do të duhet të largohet. Kjo bën fjalë edhe për mua. S’e kam problem që të respektojë kodin dhe 4 vite të tjera. Po ashtu, një tjetër gjë që sqarohet është dhe çështja e dhuratave. Sot Kryeministria ka një magazinë për dhuratat, qoftë për medaljonet, deri te dhuratat me vlera të larta monetare. Deri në 2013-ën nuk lanë në këtë godinë asnjë dhuratë protokollare, a thua se këtu ka qëndruar një fuqi pushtuese që ka marrë çdo gjë,” tha Rama duke sqaruar të gjithë ata ministra që do të marrin dhurata:

“Të gjitha dhuratat që tejkalojnë një vlerë të caktuar financiare duhen inventarizuar. Këto të gjitha mund të tingëllojnë si gjëra të vogla, apo kinezërira, por janë norma të zbatuara në të gjitha shtetet. Kodi do të vlejë njësoj edhe për zv/ministrat. Duhet të marrin dhe mbajnë përgjegjësi. Është detyra juaj të ndiqni procesin e rregullave që do të zbatojmë për ta.”

Aspekt me rëndësi, sipas Kryeministrit, është parimi i koligjialitetit, jo vetëm të anëtarëve të kabinetit, por gjithë drejtuesve. I domosdoshëm komunikimi me kryeministrinë për cdo dalje publike.

“Ky popull nuk i ka borxh asnjë përfaqësuesi të lartë kapadaillukën dhe karshillëkun publik të shefave të çfarëdollojshëm në territor. Më kanë bërë të ndihem keq në sytë e publikut disa raste të drejtorëve të institucioneve të cilët papërgjegjmërisht organizojnë mbrëmje tematiko-dëfrimi me kolektivin. Nuk flas as për 8 Marsin, as për vitin e ri, ku mund të organizohen festa por kurrësesi me fondet e agjensive dhe drejtorive. Apo ndërrmarin udhëtime pune me kanakarët e tyre jashtë shtetit, prej të cilave postojnë pa asnjë gajle momente të hareshme këndelljesh turistike, duke e bërë të neveritshme figurën e zyrtarit. Asnjë udhëtim jashtë shtetit që nuk ka marrë miratimin tuaj nuk do konsiderohet në përputhje me etikën e kësaj qeverie.”

Ministrat që kishte përballë e dijnë raportin që Edi Rama ka me administratën por ai nga vartësit e tij sot kërkoi të kundërtën, motivimin, mbrojtjen e promovimin:

“Një tjetër moment i kodit të etikës është përshkrimi i marrëdhënies së ministrit me administratën që drejton, motivimi i administratës, mbrojtjen e promovimin konstant për meritën, garantimin e derës së hapur për cdo shqiptar të talentuar, Pandemia na ka mesuar gjëra me vlerë të madhe, mund të na duhet te kombinimi i punës. Do të zhvillojmë mbledhje të posaçme lidhur me këto tre pika.”

Dhe jo vetëm kaq! Kodin Etik edhe në marrëdhënie me parlamentin.

“Qeveria buron nga parlamenti dhe jo e kundërta, prania në komisione s’duhet vihet në diskutim përvec rasteve ekstreme të njoftuara. Përvec se në raste ekstreme s’duhet të vihet në diskutim prania në orën fikse të fillimit të seancës, skeduli për largimin duhet të kombinohet me ministren e shtetit për marrëdheniet me parlamentin, prania në parlament mos mbesë pa 1/3 e qeverisë.

Një tjetër shkelje etike e vërejtur gjatë mandatit të shkuar, ka qënë dalja e disa ministrave me letra individuale dërguar komisioneve apo qëndrime individuale. Në çdo kod etik, kjo konsiderohet thyerje e rëndë e vijës së sjelljes në qeveri. Është absurde që ministri mos mbrojë një vendim të ministries, por të arrijë deri ta kundërshtojë, me idene se bie në kundërshtim me disa sektorë. sektori i kësaj qeveria është Shqipëria, buxheti është buxheti i Republikës së Shqipërisë,” tha Edi Rama duke premtuar atë që din më së miri, hapjen e faqes online për t’iu përgjigjur akuzave.

“Nuk do kundërpergjigjemi me varianitn e vjetër konferencave të shtypit të opozitës. Ka derdhur kupën e durimit të popullit, me akuza e kundër akuza. Ne kemi vetëm 4 vjet në dispozicion për të bërë të gjithcka, shqiptarët na bënë shumicë, nuk duhet të cojmë dëm asnjë ditë e orë, për t’u marrë me e lagu s’e lagu me opozitën. Në pak ditë qeveria do ketë një faqe on line ku qeveria do të përgjigjet me shkrim, dhe do të mbajë përgjegjësi, kush nuk do thotë të vërtetën do marrë përgjegjësinë morale. Në mbledhjen e parë të kabinetit të ri, vendin nuk ta mbaj unë por duhet ta mbash vetë. dyshemeja e qeverisë është ligji. Kush shkel në dërrasë të kalbur, punën e ka me ligjin,” tha Kryemnistri ndonëse kaloi një 8 vjeçar me mbrojtje publike të zyrtarëve shtetit u zotua se do i mbështes pa kursim në përpjekjet për arritjen e objektivivave, do i mbrojë e mbështes por s’do ta kenë pas, as atë as PD, kush do që hedh një hap kundër zyrës së shtetit.

“Familja ime nuk ka lidhje me punët e shtetit. Do ju kërkoja t’i mbani larg familjet tuaja nga dyert e zyrave të shtetit. Nga fondet publike, dhe nga kërkesat e të tretëve, qoftë kushërinj apo krushq. Nga fjalët e akuzat nuk do shpëtoni kurrë, nëse do punoni fort duhet të mësoheni me këtë, mundi e puna janë ato që vlejnë që mbeten. Përqëndrohuni në punë, jo në agresionet e padrejta. Sa më shumë të përpiqeni aq më shumë do të goditeni,” tha Kryeministri Rama pa sqaruar se çfarë do bëjë i vëllai Olsi, kompania e tij ku ka aksione dhe klubi Partizani.

Në fund, Kryeministri Edi Rama ka bërë të ditur 4 vendimet e para të qeverisë së re:

-Projektligji për administratën

-Projektligji për statusin e fëmijëve nën përkujdesjen e Republikës

– Përfshirjen në strukturat e Forcave të Armatosura të fituesve të medaljeve të Arit në Tokio 2020, Distria Krasniqi dhe Nora Gjakova.

-Krijimi i Agjencisë për mediat dhe informim.

Për të gjithë fëmijët e mjekëve që kanë humbur jetën nga COVID-19, Kryeministri Rama tha se deri në moshën 18 vjeç fëmijët do marrin rrogën e plotë të prindërit që kanë humbur.

“Sot me projektligjin platforma kthehet në një bazë kryesore zhvillimi  dhe kontrolli dhe një urë e hapur komunikimi për ankesat e qytetareve. Projektigji do të garantojë veprimtarinë e administratës duke hetuar fakte lidhur me abuzimet me qytetarët.

Projekti tjetër është projektligji për statusin e fëmijëve nën përkujdesjen e Republikës. Kjo është një masë e veçantë me një mbështetje dinjitoze për ata fëmijë prindërit e të cilëve kanë dhënë jetën në mbrojtjen e kombit. Do të përfitojnë të gjithë jetimët nën moshën 18 vjeç. Sipas kategorive do të përfitojnë edhe fëmijët prindërit e të cilëve që kanë humbur jetën nga Covid-19. Po ashtu do të përfitojnë fëmijët prindërit e të cilëve kanë humbur jetën në mbrojtjen e rendit publik, ata që janë  “Dëshmor i atdheut”. Të gjithë këta fëmijë do të marrin rrogën e plotë të prindit deri në moshën 18-vjeç.

Vendimi tjetër i rëndësishëm është vendimi për përfshirjen në strukturat e Forcave të Armatosura të fituesve të medaljeve të Arit në Tokio 2020, Distria Krasniqi dhe Nora Gjakova. Jemi duke punuar që në FA të krijohet një njësi special e kampionëve që meritojnë të trajtohen gjithë jetën me një status të veçantë.

Krijimi i agjencisë për mediat dhe informim e cila bazohet në disa modele të suksesshme në Itali dhe Gjermani që garantojnë transparencën në lidhje me politikat, qëllimet apo problematikat që kanë të bëjnë me veprimtarinë e Këshillit të Ministrave. Po ashtu agjencia do të sigurojë njohjen e insititucioneve që qeverisjes qendrore. Këto janë katër vendime me një domethënie të veçantë që adresojnë në mënyrë konkrret përkushtimin e qeverisë. Që shteti shqiptar të jetë pranë të gjithë atyre që janë në nevojë duke qenë pranë hallkës më të dobët, fëmijëve jetimë. duke e çuar në një nivel tjetër transparencën tonë me median dhe publikun,” tha Kryeministri Edi Rama.

Ndryshe, kjo është dhe qeveria e re “Rama 3” e cila u betua para Presidentit të Republikës, Ilir Meta, të cilin “e shkarkuan”:

1.Edi Rama- Kryeministër;
2.Arben Ahmetaj – Zëvendëskryeministër dhe ministër i Shtetit për Rindërtimin dhe Programin e Reformave;
3.Olta Xhaçka – Ministër për Evropën dhe Punët e Jashtme;
4.Niko Peleshi – Ministër i Mbrojtjes;
5.Bledar Çuçi – Ministër i Brendshëm;
6.Delina Ibrahimaj- Ministër i Financave dhe Ekonomisë;
7.Belinda Balluku – Ministër i Infrastrukturës dhe Energjisë;
8.Evis Kushi – Ministër i Arsimit dhe Sportit;
9.Ulsi Manja – Ministër i Drejtësisë;
10.Elva Margariti – Ministër i Kulturës;
11.Frida Krifca – Ministër i Bujqësisë dhe Zhvillimit Rural;
12.Ogerta Manastirliu – Ministër i Shëndetësisë dhe Mbrojtjes Sociale;
13.Mirela Kumbaro Furxhi – Ministër i Turizmit dhe Mjedisit;
14.Elisa Spiropali – Ministër i Shtetit për Marrëdhëniet me Parlamentin;
15.Edona Bilali – Ministër i Shtetit për Mbrojtjen e Sipërmarrjes;
16.Bora Muzhaqi – Ministër i Shtetit për Rininë dhe Fëmijët;
17.Milva Ekonomi – Ministër i Shtetit për Standardet e Shërbimeve.