Do të mjaftonin 13 Toyota Yaris për të mbshur gropën në buxhet…

“Do të mjaftonin vetëm 13 ‘Toyota Yaris’ për të mbushur gropën 5-mujore të arkës së shpuar së qeverisë konçesionare”.

Kështu shkruan këshilltari ekonomik në PD, Dorjan Teliti, në një postim në rrjetet sociale. Teliti duke ironizuar shkruan se do të mjaftonin vetëm 13 “Toyota Yaris” që Buxheti të mos rishikohej me ulje të ndjeshme pas 1 muaji, ulje në kurriz të investimeve, rrogave, pensioneve, shtresave në nevojë.

“Vetëm gjatë 5 muajve të parë të vitit mungojnë plot 57 milionë dollarë nga Tatimet dhe Doganat. Mosrealizime praktikisht në çdo zë të të ardhurave, nga TVSH (- 28 milionë dollarë) e deri te tatimi mbi të ardhurat personale (-10 milionë dollarë).

Nuk ka para për kompensimin e ish-të përndjekurve politikë; në 5 muaj është paguar vetëm 11% e fondit vjetor.

Nuk ka para për shtresat në nevojë; përkundrazi…plot 30 mijë familje të përjashtuara padrejtesisht nga skema.

Nuk ka para për rritje reale pagash.

Nuk ka para për rritje reale pensionesh, të varfëruar gjatë këtyre 5-viteve me të paktën 12%.

Nuk ka para për investime serioze nga Buxheti i Shtetit, përveç palmave dhe lulishteve. Ama, ka bollshëm para për një grusht njerëzish, për oligarkët që përpijnë çdo ditë arkën e shtetit, arkë e cila mund të mbushet lehtësisht me vetëm “13 Toyota Yaris”.

Çmim të shtrenjtë po paguajnë shqiptarët për arrogancën e qeverisjes “konçesionare” të padrejtësive”, shkruan Teliti.