Vendimi për Adriatik Llallën, Ambasadorja e SHBA: Drejtësia po punon kundër zyrtarëve të korruptuar!

Pas vendimit të Gjykatës së Posaçme të Apelit që la në fuqi vendimin e Gjykatës së Shkallës së parë për Ish-Prokurorin e Përgjithshëm, Adriatik Llalla, duke e dënuar me 2 vite burg për fshehje dhe mosdeklarim të pasurisë, ka reaguar Ambasadorja e SHBA në Tiranë, Yuri Kim, e cila përshëndet drejtësinë e cila punon kundër zyrtarëve të korruptuar ndërsa inkurajon prokurorët të vazhdojnë me veprime kundër zyrtarëve që keqpërdorin pozitën e tyre për t’u pasuruar.

“Më vjen mirë që shikoj se drejtësia po punon kundër zyrtarëve të korruptuar. Prokurorët duhet të vazhdojnë të ndërmarrin veprime kundër zyrtarëve – pa marrë parasysh sa të lartë apo të fuqishëm – të cilët keqpërdorin pozitën e tyre për t’u pasuruar. Askush nuk është mbi ligjin,” thekson Ambasadorja amerikane, Yuri Kim, në reagimin e saj përmes rrjetit social Twitter.

Ndryshe, Gjykata e Posaçme e Apelit ka lënë në fuqi vendimin e Gjykatës së Posaçme Kundër Korrupsionit dhe Krimit të Organizuar, e cila dënon Ish-Prokurorin e Përgjithshëm, Adriatik Llalla, me 2 vite burg, me 5 vite heqje të së drejtës për të ushtruar funksione publike si dhe konfiskim të pasurisë, për fshehje dhe mosdeklarim të pasurisë.