Sot Edi Rama në Kosovë
Pas sulmit me helikopter dhe avionë rus që i bëri Presidenti i Serbisë, Aleksandar Vuçiç, “Hapjes së Ballkanit” në Kosovë, sot Kryeministri Edi Rama viziton Prishtinën për të shpëtuar atë që mund të shpëtohet.
Vizitën në Kosovë, Edi Rama e fillon me pritjen ceremoniale në Sheshin Skënderbej në Prishtinë, për të vazhduar me takimin me Kryeministrin Albin Kurti dhe liderët e opozitës, e për të shpërqëndruar vëmendjen nga opinioni publik ai edhe me rastin e kësaj vizite përgatiti një vendim mesjetar duke e larguar nga axhenda e vizitës së tij, Presidenten e Kosovës, Vjosa Osmani.
Mospërfshirja e Presidentes së Kosovës, Vjosa Osmani, në axhendën e vizitës së Kryeministrit të Shqipërisë nuk është befasi vetëm për Presidencën pasi ata për dallim nga Albin Kurti dhe qeveria e tij, e kanë të qartë se kush është Edi Rama. Ata që nuk e dinin, kishin rastin ta konfirmojnë kur Presidentja Osmani mbajti fjalën e saj para Parlamentit të Shqipërisë kur i tha ato që Edi Rama nuk do ti dëgjoj me zë.
Ndërkohë për atë pjesë të popullit shqiptar të Kosovës që është i tronditur nga sjellja proserbe e Edi Ramës ndaj zhvillimeve të fundit në kufirin Kosovë-Serbi, si njohës i dobët i Kosovës, Kryeministri Edi Rama ka përgatitur një ceremoni ku do ta dekoroj Rexhep Qosjen, pa e kuptuar se koha e Qosjes ka ikur me atë të Kristaqit e Barba Pilos.
Ndryshe, në prag të vizitës së Kryeministrit Edi Rama në Kosovë, “vëllai” Vuçiç nuk ia ndaloi avionët rus mbi qiellin kosovar ndonëse edhe kësaj radhe Rama i mbajti anën Serbisë.
