Miliardat për Ballkani Perëndimor, Kurti: Duhet të ndërlidhen me vlerat e BE-së!

Kryeministri i Kosovës, Albin Kurti, tha se ndarja e dhjetëra miliarda eurove nga Bashkimi Evropian për shtetet e Ballkanit Perëndimor, duhet të ndërlidhen me vlerat e BE-së.

Në një intervistë për “Bloomberg”, Albin Kurti tha në Brdo të Sllovenisë se ndarja duhet të bëhet duke u bazuar në të dhënat që tregojnë shtetet mbi sundimin e ligjit dhe luftimin e korrupsionit.

Këto thirrje të Kurtit, për më shumë mbikëqyrje të BE-së në rajonin që po shihet gjithnjë e më shumë i pakënaqur me ngurrimin e përshpejtimit të procesit të zgjerimit, “Bloombergu” i ka cilësuar të rralla.

“Nuk duhet të ketë fonde të BE-së, pa vlera të BE-së,” tha Kurti duke shtuar:

“BE-ja nuk duhet të heqë dorë nga natyra e saj transformuese, për atë transaksionale”.

Ndonëse Komisioni ka aprovuar 30 miliardë euro (35 miliardë $) për shtetet e Ballkanit Perëndimor, që do shpenzohen përgjatë shtatë viteve të ardhshme, nuk ka caktuar një datë të saktë për zgjerimin, gjë që kërkohej nga shtetet aspiruese si dhe nga disa shtete anëtare. Kjo ka qenë pika e cila është refuzuar nga kancelarja gjermane Angela Merkel.

“Unë nuk e përkraha caktimin e një date për pranimin e tyre në BE,” tha Merkeli duke shtuar se anëtarësimi duhet të ndodhë me plotësimin e kushteve.

Kjo ka ngritur shqetësimin që qasja e ngadalshme ndaj zgjerimit të BE-së mund të hapë rrugën për rivalët e bllokut meqenëse disa shtete, përfshirë këtu Serbinë, kanë lidhje të ngushta me Rusinë dhe Kinën.

“Është shumë e rëndësishme që këtyre shteteve t’ju bëhet e qartë se sa shumë kujdesemi për ta,” tha Presidentja e Komisionit Evropian, Ursula von der Leyen pas përfundimit të Samitit BE-Ballkani Perëndimor në Brdo duke shtuar: “Ne jemi partneri i preferuar i tyre”.

Në fund, Kryeministri i Kosovës, Albin Kurti ka përsëritur qëndrimin e tij që BE-ja për t’u bërë Evropë duhet të zgjerohet me shtetet e Ballkanit Perëndimor.