Vuçiç u bën thirrje serbëve që të bashkohen në zgjedhjet e 17 tetorit

Presidenti i Serbisë, Aleksandar Vuçiç përmes një mesazhi i është drejtuar sot serbëve në Kosovë që në zgjedhjet lokale të 17 tetorit të jenë të bashkuar.

“Të luftojnë për veten e tyre, për të drejtat e tyre dhe për shtetin e tyre. Të dalin në zgjedhje në numër sa më të madh dhe të përfaqësohen në institucione kudo që është e nevojshme, të mund të reagojnë brenda institucioneve në forma të ndryshme, por gjithmonë në mënyrë efektive dhe në të mirë të njerëzve të tyre,” tha Vuçiç.

Më herët, raporton RFE, Vuçië ishte shprehur se të gjithë përfaqësuesit e serbëve, që garojnë në zgjedhjet lokale, e që nuk janë pjesë e Listës Srpska, nuk do ta kenë mbështetjen e Beogradit zyrtar.

Lista Srpska është partia më e madhe e serbëve në Kosovë. Kjo parti, me mbështetjen e Beogradit zyrtar u formua më 2013. Që atëherë, ajo është partia kryesore serbe e Kosovës, e cila në të gjitha zgjedhjet lokale dhe parlamentare, ka fituar rreth 90 për qind të votave të votuesve nga radhët e komunitetit serb.

Në zgjedhjet e fundit parlamentare, Lista Srpska fitoi të dhjetë vendet e garantuara për komunitetin serb në Parlamentin e Kosovës. Gjithashtu, të dhjetë komunat me shumicë serbe në Kosovë udhëhiqen nga Lista Srpska.

Ndryshe, në zgjedhjet lokale të 17 tetorit të drejtë vote kanë 1.8 milionë qytetarë të Kosovës, që do të zgjedhin 38 kryetarët e rinj të komunave dhe anëtarët e asambleve komunale.