BE eksportuesi më i madh i vaksinës kundër koronavirusit

Bashkimi Europian, BE, është eksportuesi më i madh i vaksinës në botë prej më shumë se 1 miliard doza të vaksinës kundër COVID-19 të eksportuara në 10 muajt e kaluar, po aq sa u janë dërguar qytetarëve të BE, tha Presidentja e Komisionit Europian, KE, Ursula von der Leyen, duke shtuar se 500 milionë doza do të jenë donacion gjatë muajve të ardhshme për shtetet më të varfëra  

“Vaksinat e prodhuara në BE janë eksportuar në më shumë se 150 shtete në të gjitha kontinentet, nga Japonia deri në Turqi, Mbretërinë e Bashkuar e deri te Zelanda e Re, Afrika e Jugut e Brazili,” tha Von der Leyen duke shtuar:

“U kemi dërguar 87 milionë doza vendeve me të ardhura të ulëta dhe të mesme përmes COVAX. Bashkimi Europian është eksportuesi më i madh i vaksinave kundër COVID-19.”

BE ka eksportuar sasinë po aq sa u është dërguar qytetarëve të BE, tha Presidentja e KE, ku 75 për qind e popullsisë së rritur është vaksinuar.

Duke bërë të ditur se BE në muajt e ardhshëm do të jap në formë donacioni të paktën 500 milionë doza për vendet e varfëra, Von der Leyen i bëri thirrje edhe shteteve tjera që të ndihmojnë këto vende.