VIDEO/ Basha: Shqipërisë nuk i janë hapur negociatat me BE, nuk ka as vendim dhe as date…
Këshilli Europian nuk do ta shqyrtojë fare nesër ccështjen e hapjes së negociatave dhe e ka shtyrë këtë vendimmarrje të paktën për një vit për në qershor 2019.
Kështu u shpreh kreu demokrat Lulzim Basha në një konferencë për shtyp nga selia e PD-së. Basha theksoi se Shqipërisë nuk i janë hapur negociatat me BE-në dhe nuk ka as vendim për hapjen e negociatave, as datë për hapjen e negociatave.
“ Hapja e negociatave do të duhet të diskutohet nga parlamentet e atyre vendeve që e kërkojnë këtë procedurë për të autorizuar apo këshilluar qeveritë përkatëse.
Vetëm nëse vendet anëtare konsiderojnë se Shqipëria I ka përmbushur kushtet atëherë do të futet në axhendën e vendmimmarrjes në Këshillin Europian në qershor 2019.
Qeveria dhe makina e saj e propagandës ka zgjedhur t’i mashtrojë shqiptarët edhe këtë herë duke ju thënë që “janë hapur negociatat”. Edhe këtu nuk ka asgjë të re, mashtrimi dhe gënjeshtra janë e vetmja gjë që kjo qeveri bën.
Në javët e muajt e ardhshëm ne do të na duhet duhet të reflektojmë thellë për të ndryshuar thellësisht politikën dhe qeverisjen, për t’ju rikthyer në mënyrë të sigurtë perspektivës europiane”, theksoi kreu demokrat.
Sipas tij, gjuha që përdori Këshilli Europian konfirmoi edhe një herë se moshapja e negociatave nuk është refuzim as i shqiptarëve dhe as i perspektivës Europiane të Shqipërisë.
“Përkundrazi sikurse deklaroi Këshilli rruga e shqiptarëve dhe Shqipërisë drejt BE-së është e hapur dhe është plotësisht në dorën tonë që të përparojmë në këtë rrugë për t’u bërë pjesë e BE-së.
Moshapja e negociatave është refuzim ndaj krimit dhe korrupsionit që ka pushtuar Shqipërinë nën qeverisjen Rama, është refuzim i politikës së kapur nga krimi dhe i ekonomisë të kontrolluar nga paratë e drogës dhe të krimit”, theksoi Basha.
Ai shtoi se moshapja e negociatave është refuzim personal ndaj Edi Ramës dhe klikës së inkriminuar që sundojnë mbi shqiptarët.
“Është refuzim i Saimir Tahirit, Fatmir Xhafajt, Taulant Ballës, Damian Gjiknurit, Arben Ahmetajt, Vangjush Dakos, Qazim Sejdinit, Elvis Rroshit, dhe kupolës politike të PS, pothuajse e gjitha e lidhur me krimin dhe me drogën”, tha Basha.
“Sjellja e Ramës edhe pas refuzimit për hapjen e negociatave duke mashtruar pa turp shqiptarët tregon qartë se Edi Rama nuk ka për të përmbushur asnjë nga kushtet për ti hapur negociatat as në vitin 2019.
Zgjedhja e tij nuk është Europa, por krimi, korrupsioni dhe droga.
Sot ka vetëm një rruge që të sigurojmë Europën: Të përballemi me të vërtetën, se është qeveria e Edi Ramës ajo që na mban larg Europës.
Në emër të Partisë Demokratike siguroj shqiptarët se opozita do të bëjë gjithçka për t’u çliruar nga kjo e keqe e madhe, në mënyrë që të realizojmë së bashku anëtarësimin e vendit në Bashkimin Europian”, theksoi Basha.
