FDA pritet të miratoj pilulën e Pfizer kundër COVID-19

Kompania farmaceutike, Pfizer, tha se pilula e saj antivirale për COVID-19, sëmundjen që shkakton koronavirusi, zvogëlon për gati 90 për qind mundësitë e shtrirjes në spital dhe vdekjes.

Pfizer tha se do t’i kërkojë Administratës amerikane për Ushqim dhe Ilaçe, FDA, dhe rregullatorëve ndërkombëtarë që ta autorizojnë pilulën sa më shpejt që është e mundur.

Hulumtuesit në gjithë botën janë duke punuar për të krijuar një pilulë për ta trajtuar koronavirusin, në mënyrë që njerëzit të mos shkojnë nëpër spitale.

Nëse konfirmohet veprimi i pilulës kundër COVID-19, atëherë mund të merret në shtëpi për të lehtësuar simptomat dhe për të shpejtuar shërimin.

Shefi i kompanisë Pfizer, Albert Bourla tha se kompania është në diskutime aktive me 90 shtete për t’i furnizuar me pilulë.

“Synimi ynë që është secili person të botë të jetë në gjendje ta ketë atë sa më shpejt që është e mundur,” tha Bourla në një intervistë për Agjencinë e lajmeve, Reuters.

Një pilulë tjetër e krijuar nga kompania Merck, raporton RFE, është duke u analizuar nga FDA për miratim. Britania e Madhe është bërë shteti i parë që ka miratuar përdorimin e kësaj pilule më 4 nëntor. Merck është shprehur se pilula e saj zvogëlon mundësinë e shtrirjes në spital dhe vdekjes nga COVID-19, për 50 për qind.

Megjithatë, rregullatorët amerikanë vazhdojnë të theksojnë se vaksinimi mbetet mënyra më e mirë për t’u mbrojtur nga ky virus.