Anglia-Belgjika, dueli për kreun në Grupin G

Të dy përfaqësueset evropiane kanë siguruar tashmë kualifikimin në 1/8 e finales. Me ndeshjet e sotme do të mbyllet faza e grupeve në Kampionatin Botëror, Rusia 2018.

Në këto ndeshje do të përcaktohen edhe dy çiftet e fundit të fazës së 1/8 së finales në Botëror, me Anglinë dhe Belgjikën, që do të njihen me kundërshtarët e tyre të Grupit H.

Pikërisht në këtë grup janë tri skuadra që kanë mundësi të vijojnë më tej, Japonia, Senegali dhe Kolumbia, ndërsa Polonia, me 0 pikë në dy ndeshjet e parë, luan vetëm për statistikë, sepse praktikisht është e blinduar në vendin e fundit.

Në Grupin G është një situatë e pazakontë, sepse Anglia është në vendin e parë vetëm falë kriterit të fair play-t. Edhe Belgjika ka gjashtë pikë dhe golaverazhi është i njëjtë 8-2, por “Djajtë e Kuq” janë ndëshkuar me një karton të verdhë më shumë.

Sfida mes tyre, që do të zhvillohet në orën 20:00, do të përcaktojë ekipin kryesues, që do të përballet me skuadrën e dytë të Grupit H.

Takimi mes Panama-Tunizi, ajo do të luhet vetëm për krenari, pra për të shmangur vendin e fundit. Të dy këto kombëtare nuk kanë asnjë pikë pas dy ndeshjeve të para.

Në orën 16:00, në Volgograd Arena, Japonisë do t’i mjaftonte edhe barazimi me polakët për të vijuar më tej, ndërsa sfida mes Senegalit dhe Kolumbisë në Cosmos Arena të Samaras luhet për gjithçka.

Përfaqësuesja afrikane ka në dispozicion edhe barazimin, ndërsa Kolumbisë i duhet patjetër fitorja për të mos u varur nga rezultati i takimit tjetër. Ekziston një skenar, sipas të cilit, nëse Senegali barazon me Kolumbinë dhe Japonia humbet me Poloninë atëherë do të ishin “Samurajët” ata që do të largoheshin nga Botërori.