Mbledhja e dy qeverive, 15 marrëveshje të firmosura mes Shqipërisë dhe Kosovës

15 marrëveshje u firmosën sot nga mbledhja e dy qeverive, finalizimi i të cilave do të menaxhohet nga Sekretariati Koordinues Ndërqeveritar.

Marrëveshja për heqjen e lejeqëndrimit të përkohshëm, për njohjen e sigurimeve shoqërore, ajo për studimin e fizibilitetit për segmentin hekurudhor Durrës – Prishtinë, rregullimi i trafikut në kufi apo edhe njohja e diplomave, janë disa nga marrëveshjet e firmosura sot.

Lista e plotë e marrëveshjeve të firmosura

• Marrëveshja ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për heqjen e lejeqëndrimit të përkohshëm;
• Marrëveshja ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për rregullimin e regjimit të trafikut lokal të kufirit;
• Marrëveshja ndryshuese e Marrëveshjes ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për hapjen e pikës së përbashkët të kalimit kufitar Shishtavec (Kukës) – Krushevë (Dragash);
• Marrëveshje ndërmjet Këshillit të Ministrave të Republikës së Shqipërisë dhe Qeverise se Republikës së Kosovës “Për ndihmë të ndërsjellë juridike në çështjet civile dhe tregtare”;
• Për miratim, në parim, të marrëveshjes, ndërmjet Republikës se Shqipërisë dhe Republikës së Kosovës, për sigurimet shoqërore;
• Marrëveshje ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për zbatimin e lehtësirave të ndërsjella në procedurat doganore dhe/ose të kontrollit të hyrje/daljes së mallrave;
• Kalendari i përbashkët Kulturor Vjetor Shqipëri-Kosovë, për vitin 2021-2022;
• Marrëveshje Bashkëpunimi: Në fushën e Trashëgimisë Kulturore midis MKRS & MK;
• Protokoll Bashkëpunimi Ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për krijimin e Sekretariatit Koordinues Ndërqeveritar.
• Marrëveshje për studimin e fizibilitetit për ndërtimin/rehabilitimin e segmentit hekurudhor Durrës-Prishtinë;
• Marrëveshje bashkëpunimi ndërmjet Ministrisë së Shëndetësisë dhe Mbrojtjes Sociale të Republikës së Shqipërisë dhe Institucionit kompetent të palës kosovare;
• Marrëveshje dypalëshe për lehtësimin e procedurës së njohjes se diplomave nga IAL-të (të konfirmimit të të diplomuarve nga Qendrat Kombëtare respektive të Njohjes së Diplomave);
• Manual i Përbashkët për procedurat standarde të operimit në Doganën e Durrësit; Manuali Për procedurat standarde të operimit në piken e përbashkët të kalimit kufitar (PPKK) Morinë-Vermicë;
• Marrëveshje dypalëshe për qasje të ndërsjellë në modulet e riskut;
• Marrëveshje bashkëpunimi ndërmjet Drejtorisë së Përgjithshme të Arkivave të RSH-së dhe Agjencisë Shtetërore të Arkivave të Republikës së Kosovës.

Ndryshe, në mbledhjen e dy qeverive Shqipëri – Kosovë që u zhvillua në Elbasan, Kryeministri Edi Rama deklaroi se këto marrëveshje do të sjellin bashkëpunimin mes dy shteteve me pranë

“Sot mblidhemi pas dy vitesh. Kemi një numër të konsiderueshëm gjërash që janë diskutuar e janë vënë në vijë. Një pjesë janë në rrugën e zbatimit, dhe një pjesë janë zbatuar. Ndërkohë sfida e përbashkët është të rrisim zbatueshmërinë e marrëveshjeve dhe të realizojmë një sinergji të plot mes të dyja shteteve në të gjitha fushat. Sot e sjellim bashkëpunim e dy shteteve më pranë njerëzve. Më vjen mirë që sot angazhohemi për hapjen e pikës kufitare në Shishtavec, rregullimin e trafikut lokal të kufirit dhe leje-qendrimin”- tha Rama.

Nga ana tjetër, homologu i Kosovës, Albin Kurti, deklaroi se duhet që marrëveshjet mes dy vendeve të gjejnë zbatim.

“Unë vij për herë të parë në takimin e përbashkët të qeverisë.  Mandatin e parë si kryeministër e mbajtja 4 muaj dhe këtë e kam bërë 8 muaj, pra jam duke përparuar.  Të thuash se jemi të lumtur se jemi një komb i ndarë, do të ishte marrëzi, të thuash se kemi dy shtete se jemi më të fortë është shkurtpamësi, e të thuash se do të bashkoheshim, je nacionalist dhe të thuash se do të bashkohesh në BE, do të shqyhesh për diplomat. Le të flasim si diplomat dhe të punojmë si patriot. Integrimi i dy shteteve tona është sa strategjik dhe parimor, numri i marrëveshjeve duhet të shoqërohet me cilësi në zbaritin e tyre. Si patriot duhet ti forcojmë të dy shtete tona, patriotizëm sot është të luftosh krimin, të punosh për lirinë e mediave dhe ekonomi gjithëpërfshirëse”, tha Kurti.

Kreu i qeverisë tregoi se çfarë hapash janë marrë për arritjen e një tregu të përbashkët mes dy vendeve.

“Krijojmë kushte shumë më të favorshme për të dyja anët e kufirit për aksesin në tregun e punës, dhe një tjetër hap për një treg të përbashkët, ku shqiptarët mund të studiojnë, punojnë dhe pastaj të dalin në pension pavarësisht vendit gjeografik ku është. Njohja e sigurimeve shoqërore jep një mesazh të plotë për lirinë e çdo shqiptari për të jetuar e punuar në të anët e kufirit. Të diplomuarit e universiteteve tona shumë shpejt do të kenë njohje automatike diplomash. Hiqet menjëherë një procedurë burokratike e mbuluar me shkresa”, tha Rama.

Dy qeveritë kanë firmosur një memorandum bashkëpunimi për nisjen e një studimi fizbiliteti për ndërtimin e hekurudhës Durrës-Prishtinë.

“Bashkëpunimi  për jetësimit të integrimit në BE për të kualifikuar projekte të financuara nga plani i investimeve të BE për projektet që prekin të dy vendet. Pas nisjes punës për hekurudhën Tiranë-Rinas-Durrës, tashmë kemi nënshkruar një memorandum bashkëpunimi për nisjen e një studimi fizibiliteti për Hekurudhën Durrës-Prishtinë, është ëndërr e kahershme, sot ne jemi më të lehtësuar se hedhim një hap konkret dhe, nga ana tjetër, jemi të bindur se në varësi të cilësisë së këtij studimi do të prezantojmë bashkërisht këtë projekt për të aksesuar fonde nga plani evropian i investimeve”, tha Rama.

Rama: Lehtësojmë procedurat doganore për kontrollet e mallrave 

Gjithashtu me Kosovën është firmosur edhe marrëveshja për lehtësimin  e procedurave doganore për kontrollin e mallrave në kalimin doganor.

“Nga ana tjetër jemi shumë të qartë se në dy anët kemi nevojë të përmirësojmë kushtet për hapjen e tregjeve dhe shtimin e ndërveprimit ekonomik e tregtare. Të integrojmë tregjet tona. Sot firmosim marrëveshje për të lehtësuar proceduarat doganore për kontrollit të mallrave që synojnë unifikimin e proceduara të kalimit doganor”, tha Rama.

Një abetare të unifikuar mes Shqipërisë dhe Kosovës

“Dua të theksoj diçka që me Albinin e kemi gjetur si emërues të përbashkët, të vullnetit për të ekzekutuar ato që vendosim. Sot nuk jemi në një mbledhje që ka gjithmonë peshën e vet simbolike, por përtej, sot me vjen mirë që jemi në një mbledhje punësh konkrete të materialuzar në punë konkrete, është prioritet që gjithçka që kemi vendosur të jetë në krye të agjendës së punës së të gjithë ministrave përkatës, për të mos lejuar që në rrugën e zbatimit këto fjalë të nënshkruara të mbeten fjalë.

Në mbledhjen e ardhshme do të kemi rezultate konkrete në ndërveprimin real mes njerëzve e sipërmarrjeve. Për vitin e ardhshëm që është edhe një vit jubilar për Pavarësinë, të kemi gati abetaren e unifikuar. Abetarja është një libër themeltar për këdo që hyn në rrugën e arsimit. Duhet të kemi vetëm një abetare.  Të ndajmë sa bashku, të kemi një abetare të Gjuhës Shqipe në Shqipëri dhe Kosovë dhe këtë abetare unike ta kemi në të gjitha hapësirat ku fëmijët mësojnë shqip”, deklaroi kryeministri.

Ky është takimi i 7 mes dy qeverive. Takimi i parë mes Kosovës dhe Shqipërisë është mbajtur më 11 janar 2014. Deri më tani janë nënshkruar rreth 130 marrëveshje, memorandume dhe protokolle bashkëpunimi./Monitor/