Përgjigje Berishës, Basha: Ka vetëm një dosje, ajo është NON GRATA nga SHBA
Kryetari i Partisë Demokratike, Lulzim Basha, i është përgjigjur akuzave të liderit historik Sali Berisha nga “Foltorja e Bilishtit për “Toyota Yaris”, duke theksuar se e vetmja dosje dhe e vetmja çështje është ajo NON GRATA nga SHBA.
“Trillimet e shpifjet nuk e zgjidhin dot hallin e Sali Berishës. Ka vetëm një dosje, ka vetëm një çështje dhe ajo është çështja NON GRATA nga SHBA,” thekson Lulzim Basha në reagimine tij përmes rrjetit socia Twitter duke përfunduar:
“Është kjo çështje që e detyron Sali Berishën të bjerë kaq poshtë me shpresën se do ta shndërrojë PD-në në mburojë të interesave personale. Nuk ka gjë më të ulët se të përdorësh demokratët dhe ndjeshmëritë e tyre si mish për top për hallin tënd personal!”
Ndryshe, lideri historik i PD, Sali Berisha, tha nga “Foltorja” e Bilishtit se ndaj Kryetarit të Parisë Demokratike, Lulzim Bashës, është hapur një hetim në Belgjikë, në lidhje me paratë e gjetura brenda makinës “Toyota Yaris” pasi Edi Rama i mbylli dosjen në Tiranë dhe dënoi vetëm një njeri.
“Dosja i ka rrënjët në Belgjikë, atë dosje nuk ia mbyllte dot Edi Rama. Nëse Rama pengut ia mbylli dosjen e Tiranës atje nuk ia mbyllte dot. Këtë kohë gazetarët kanë zbuluar dokumente në të cilat Ministria e Drejtësisë jep dritën jeshile për ndjekjen penale të Bashës me kërkesë të autoriteteve belge, kjo ka ndodhur në vitin 2019, e vazhdon ende e sot. Fjala është e drejtësisë belge,” tha Sali Berisha nga “Foltorja” në Bilisht.
