Sanksionet, Presidentja e Kosovës: Rajoni ynë s’do bëhet parajsë e grupeve kriminale
Presidentja Vjosa Osmani duke përshëndetur sanksionet e Departamentit Amerikan të Thesarit ndaj Zvonko Veselinoviçit dhe grupit të tij ndërkombëtar të krimit të organizuar nga veriu, siguron se institucionet e Kosovës do të bashkëpunojnë me SHBA për të siguruar që rajoni ynë të mos bëhet një parajsë e sigurt për grupet kriminale .
“I mirëpres sanksionet e Shteteve të Bashkuara ndaj Veselinoviçit dhe grupit të tij ndërkombëtar të krimit të organizuar nga veriu i Kosovës. Institucionet e Flamurit të Kosovës janë plotësisht të përkushtuara për sundimin e ligjit dhe do të bashkëpunojnë me SHBA për të siguruar që rajoni ynë të mos bëhet një parajsë e sigurt për grupe të tilla kriminale,” thekson Vjosa Osmani në reagimin e saj përmes rrjetit social Twitter.
Ndërsa Kryeministri i Kosovës, Albin Kurti, tha se Vendimi i sotëm i Shteteve të Bashkuara vërteton legjitimitetin e veprimeve të Policisë së Kosovës javë më parë në komunën veriore të Mitrovicës kundër kontrabanduesve të mallrave ilegale.
“Përgjegjës për trafikimin e mallrave, parave, narkotikëve dhe armëve në mes Kosovës dhe Serbisë, ky grup është dëshmia më e mira se krimi në veriun e Kosovës është realitet i përditshëm që cenon ligjshmërinë e të drejtat, lirinë dhe të mirat e qytetarëve. Vendimi i sotëm i Shteteve të Bashkuara të Amerikës vërteton legjitimitetin e veprimeve të Policisë së Kosovës javë më parë në komunën veriore të Mitrovicës kundër kontrabanduesve të mallrave ilegale.
Lidhjet e bashkëpunimit ndëretnik të grupeve kriminale dhe fushëveprimit të tyre transnacional do t’i luftojmë nëpërmjet bashkëpunimit të zyrtarëve të institucioneve tona pa dallim etnie dhe bashkëpunimit ndërkombëtar me aleatët e partnerët tanë,” thekson Albin Kurti në reagimin e tij duke përfunduar.
“Krimi i organizuar është rrezik i sigurisë kombëtare. Republika e Kosovës është e të gjithë qytetarëve të saj. Qeveria e Republikës së Kosovë ka prioritet luftimin e krimit të organizuar dhe korrupsionit.”
Ndryshe, sot Zyra e Departamentit Amerikan të Thesarit për Kontrollin e Pasurive të Huaja ka identifikuar 16 individë nga 24 entite në disa shtete të Evropës dhe Hemisferës Veriore, në mesin e tyre edhe Zvonko Veselinoviçin dhe grupin e tij të krimit të organizuar si përgjegjës për trafikimin e mallrave, parave, narkotikëve dhe armëve mes Kosovës dhe Serbisë.
