Arrestohet Ish-Prokurori i Përgjithshëm Adriatik Llalla
Sot në Romë është arrestuar Ish-Prokurori i Përgjithshëm, Adriatik Lalla.
Ndërkohë Policia e Shtetit në informacionin zyrtar mbi arrestimin e Ish-Prokurorit të Përgjithshëm, Ardiatik Llalla thekson se ai u arrestua në Romë me qëllim ekstradimin e tij drejt Shqipërisë. Ai rezulton i dënuar me 2 vite burg, për veprën penale “Refuzimi për deklarim, mosdeklarimi, fshehja ose deklarim i rremë i pasurive, interesave private të personave të zgjedhur dhe nënpunësve publikë ose i çdo personi tjetër që ka detyrim ligjor për deklarim”.
Ndryshe, pasi Gjykata e Apelit i dha formë të prerë vendimit të dënimit të tij me 2 vite burg, Ish-Prokurori i Përgjithshëm, Adriatik Llalla, u largua nga Shqipëria më 9 shtator ndërsa urdhër arresti për të është firmosur më 22 shtator.
Njoftim i Policisë Shtetit:
Një tjetër person në kërkim ndërkombëtar bie në pranga, falë shkëmbimit të informacionit mes Interpol Tiranës dhe zyrës homologe të Interpol Romës. Kapet në Itali, me qëllim ekstradimi drejt Shqipërisë, shtetasi shqiptar Adriatik Llalla.
Nga Zyra Qëndrore Kombëtare e Interpol Tiranës, falë shkëmbimit të informacionit me Interpol Romën, u bë i mundur arrestimi provizor, me qëllim ekstradimi drejt vendit tonë, i shtetasit shqiptar Adriatik Llalla, 52 vjeç, banues në Tiranë.
Ky shtetas ishte shpallur në kërkim ndërkombëtar nga ZQK Interpol Tirana, pasi Gjykata e Posaçme e Shkallës së Parë për Korrupsionin dhe Krimin e Organizuar e ka dënuar me 2 vite burg, për veprën penale “Refuzimi për deklarim, mosdeklarimi, fshehja ose deklarim i rremë i pasurive, interesave private të personave të zgjedhur dhe nënpunësve publikë ose i çdo personi tjeter që ka detyrim ligjor për deklarim”.
Falë informacioneve të marra nga strukturat e Policisë së Shtetit, për vendndodhjen e këtij personi, si dhe shkëmbimit të informacionit mes Interpol Tiranës dhe Policisë italiane u bë i mundur lokalizimi dhe arrestimi i tij, me qëllim ekstradimi drejt vendit tonë.
