Rithemelim ose fundi i PD!

nga Agim Popoci

Ndonëse pakënaqësia në Partinë Demokratike që filloi me një grupim i cili u organizua rreth “Foltores” ngjalli shpresën ndër demokratë dhe u finalizua me një Kuvend Kombëtar nga i cili doli dhe Komisioni për Rithemelimin e PD, ajo që ndodhi dje në selinë e PD dëshmon se i gjithë procesi kërkon një përshpejtim në mënyrë që të shpëtohet ajo që mund të shpëtohet, meqë rrugëzgjidhjet janë të pakta për ta rithemeluar Partinë e  Lirisë!

Prezenca e Komisionit të Rithemelimit në selinë e PD pa dhunë, u pa se ishte e kot për Kryetarin e shkarkuar të PD sepse la pa punë policët e Edi Ramës që po prisnin thirrjen e Bashës për ndërhyrje; Por, kjo prezencë edhe si e tillë, pra,  paqësore, gërvishti Lulzim Bashën dhe na doli një Gramoz! Një fatosklos i cili na tha atë që e thotë Sigurimit i Shtetit për 24 vjet, se trazirat e vitit 1997 i shkaktoi Sali Berisha me kriminelët e tij, duke injoruar faktin se ata “kriminelë” sot Basha i ka në krah!    

Dhe jo vetëm kaq! Lulzim Basha na tha se fajtor edhe për 21 Janarin është Sali Berisha! Konstatim i çuditshëm i ministrit të Brendshëm për protestën ku u vranë 4 protestues të dhunshëm më 21 Janar 2011, duke mos e pranuar fajin por duke e pranuar se ai nuk ishte zot shtëpie në atë institucion; Institucion, i cili liberalizoi vizat për shqiptarët, dhe në kohën kur ishte në garë për Kryeministër, po ky njeri na tha në prillin e vitit 2021, se ndodhi sepse Ministria e Brendshme drejtohej nga ai dhe jo Saliu! Dhe, për ti shkuar deri në fund shërbimit duke abuzuar me 21 Janarin, ai shfajësoi dhe Edi Ramën duke fajësuar Tom Doshin për këtë protestë që përfundoi tragjikisht ndonëse Toma nuk ishte asgjë më shumë se sa një hyzmeqar i Ramës si mijëra të tjerë që iu përgjigjën ftesës së Kryetarit të PS për të protestuar kundër korrupsionit të Ilir Metës!

Pse i nxori nga goja gjithë këta argumentë dje, që për vite të tëra i thanë mediat në shërbim të Sigurimit të Shtetit, nuk dihet, por Lulzim Basha pa dashje dha përgjigje në shumë enigma për të cilat nuk flet as ai që e solli në PD, Sali Berisha; Pra, pse vetëm bashkëpunëtorët e Sigurimit të Shtetit i kishte gjithmonë shkronjës të fjalimeve të tij, pse promovonte gjithmonë analistë të majtë për të anonçuar politikat e tij “të djathta” dhe pse i injoroi për 8 vjet gazetarët që i kanë shërbyer dhe i shërbejnë Partisë Demokratike, nëse përkon edhe me unin e tij!

Pavarësisht kësaj biografie të pistë të lidershipit të kapur nga Sigurimi i Shtetit, Partia Demokratike ka një shans për tu rithemeluar dhe kjo nuk lidhet as me Kuvendin e 11 Dhjetorit, as me rezultatin e Referendumit dhe as me Kuvendin e 18 Dhjetorit.

Më idealja do ishte që si Lulzim Basha ashtu dhe Sali Berisha të heqin dorë nga drejtimi i Partisë Demokratike, dhe rikthimi i normalitetit do të ishte çështje kohe. Meqë kjo ka pak mundësi të ndodhë, atëherë ngelen tre skenarë!

Nëse Sigurimi i Shtetit ndërhynë me metodat e tij dhe arreston Lulzim Bashën për 2-3 orë para Kuvendit të 18 Dhjetorit, atëherë mbështetja për Kryetarin e shkarkuar të PD mund të rritet artificialisht duke e cilësuar Sali Berishën palë me Edi Ramën! Realisht këtu mund të ndryshojnë gjërat!

Ndryshe, nëse Vendimet e Kuvendit të 11 Dhjetorit përfundojnë në duart e një gjyqtari normal, ose thënë në gjuhën e zakonshme shqipe, “të Saliut”, dhe vendimet pranohen si të tilla duke u zyrtarizuar nga drejtësia e reformuar, telenovela rreth Kryetarit dhe fatit të PD përfundon këtu duke i hap rrugën Lulzim Bashës të vazhdoj i qetë me milionat e fituar në opozitë, të jetoj në vendin e kanaleve, Holandë!

Dhe, në fund, nëse Vendimet e Kuvendit të 11 Dhjetorit përfundojnë në duart e një gjyqtari “të Edi Ramës”, sërish Lulzim Bashës do ti hapet rruga drejt Holandës sepse ai edhe si fitues në Gjykatë nuk do ta gëzojë Partinë Demokratike.

Për shkak të efektit që shkakton dhuna shtetërore, urojmë që ky lloj skenari të mos ndodhi sepse pushon së ekzistuari PD dhe jo vetëm!