Dokumenti/ Komisioni i Rithemelimit të PD: Lulzim Basha, liro zyrën deri më 5 Janar!

Sot Komisioni i Përkohshëm i Rithemelimit të Partisë Demokratike nga selia e PD bëri publik dhe vendimin me shkrim të cilin e premtoi lideri historik Sali Berisha duke i dhënë afat Kryetarit të shkarkuar Lulzim Basha që të lirojë zyrën e kryetarit të partisë deri më 5 janar ndryshe do të përballet me përmbaruesin politik të këtij vendimi, anëtarësinë e PD.

“Kuvendi i partisë ka vendosur shkarkimin tuaj nga detyra. Pavarësisht se sipas nenit 43, germa ç, kjo vendimarrje mund të ishte vetëm e Kuvendit, ky i fundit në respekt të mijëra demokratëve vendosi ta ratifikonte vendimarrjen përmes referendumit të mbajtur sipas parimit një anëtar një votë. Rezultati i tij përfundimtar sanksionon se 43 mijë demokratë kanë vendosur në favor të vendimit të Kuvendit Kombëtar dhe shkarkimin tuaj nga detyra e kryetarit të partisë,” thuhet në letrën e Komisionit Rithemelimit të Partisë Demokratike drejtuar deputetit Lulzim Basha dhe në dijeni të trupit diplomatik të akredituar në Shqipëri duke shtuar:

“Komisioni i Përkohshëm i Rithemelimit të PD, si organi më i lartë deri në krijimin e organeve të reja, me anë të këtij komunikimi zyrtar ju fton të njiheni me vullnetin e PD dhe organeve më të larta vendimarrëse. Kërkohet nga ana juaj që të merrni të gjitha masat për ta jetësuar vullnetin e demokratëve duke liruar ambientet e punës së kryetarit të partisë, si dhe duke kryer menjëherë dorëzimet përkatëse te Komisioni i Përkohshëm, deri më 5 janar 2022.”

Në fund, Komisioni i Rithemelimit të Partisë Demokratike në emër të të cilit deputeti Belind Këlliçi, lexoi letrën i bëri të qartë kryetarit të shkarkuar Lulzim Basha se cili do të jetë fati i tij nëse refuzon vullnetin e 43.385 demokratëve”

“Refuzimi i vendimit të Kuvendit Kombëtar dhe vullnetit të 43 mijë anëtarëve që ratifikuan vendimin e shkarkimit tuaj, do detyrojë anëtarësinë e PD të shndërrohet në pëmbaruesin politik të vendimit dhe vullnetit të saj!”