Propozimi i fundit për Lulzim Bashën!

nga Edi Paloka

Bashkëpunimi prej 8 vitesh në opozitë, si nënkryetar i PD, më ka imponuar gjatë kësaj kohe, një qëndrim më të tërhequr e më pak agresiv ndaj teje. Ky qëndrim ka ardhur jo vetëm për hir të marëdhënies personale gjatë këtyre viteve, por kryesisht si marrje përgjegjësie mbi veten për aq sa më takon nga funksionet drejtuese që kam mbajtur në PD.

Nga 9 shtatori jam pozicionuar qartë në krah të Berishes, për shumë arsye, po mbi të gjitha me bindjen se jam në krahun e së drejtës. Më pas ju binda vullnetit të shumicës absolute të demokratëve për mbledhjen e Kuvendit të 11 dhjetorit, siç duhet të kishin bërë të gjithë drejtuesit e PD duke filluar nga ty i pari.

Ndërkaq ti zgjodhe që përballë vullnetit dhe interesit të demokratëve të mbroje interesin tend, lidhur tek karrigia e kryetarit të opozitës e në funksion të këtij interesi ngrite gjithë qëndrimet e mëtejshme duke ju dhënë goditje pas goditjesh atyre që për tetë vite luftuan e sakrifikuan për ty.

Më 9 shtator deklarove se po merrje një vendim të detyruar nga të tjerë, kundër bindjes tënde dhe nuk le fjalë lartësimi pa përdorur për Berishën. More vendimin e gabuar, në mënyrën më të gabuar e ç’ishte më e keqja, duke qenë i paralajmëruar për pasojat që ai vendim do të sillte për PD!

Më pas, kur jo vetëm Berisha, por shumica e demokratëve tu kundërvunë, ti nuk zgjodhe ata si kryetar i tyre, por zgjodhe rrugën e kundërt!

Nga ai moment, qëndrimet e kundërshtareve më të egër të PD, u bënë qëndrimet e tua. E akuzove Berishen me fjalët e Ramës për çdo gjë, madje edhe për ato gjëra ku ti kishe përgjegjësi personale siç ishte 21 janari. E akuzove si “komunist”, si shkaktar të ‘97 e më tej…! Mirë që nuk e akuzove dhe se ka “vjedhur” Rrugën e Kombit !

Sigurisht që nuk i mendoje të gjitha këto kur Berisha të katapultoi fillimisht si deputet, pastaj tre herë ministër, më pas kryetar bashkie e në fund kur në opozitë të la në dore postin e kryetarit të PD. I more të gjitha ato poste e privilegje, vetem prej Sali Berishës e prej askujt tjetër. Asnjë meritë, asnjë kontribut, e ca më pak sakrifica, nuk kishe në PD deri ditën që ai të katapultoi. E pra, ai Berishë ishte, “komunisti që paskësh shkaktuar ‘97 “ edhe kur të dha gjithë ato poste e privilegje. Madje ai ishte dhe më 9 shtator!

Megjithatë, sikur këtu të bëhej fjalë thjeshtë për një marrëdhënie mes Berishës dhe tejë mbase unë do të zgjidhja thjeshtë të heshtja. As me Berishën e as me ty, unë nuk kam patur marrëdhënien e ngushtë që ju keni patur me njëri tjetrin. Por ketu nuk bëhet fjalë për këtë, po për PD, për të gjithë ne.

Në fakt me slloganet “Te ndahemi nga e shkuara e të shohim të ardhmen” ti u ndave nga PD. Me sulmet e akuzat e Rames ndaj Berishës, ti ke hedhur poshtë e ke mohuar gjithë historinë e PD , gjithë sakrificat e demokratëve në 30 vite. Të atyre demokratëve që të dhanë gjithëshka e nuk ju dhe kurrë çfarë prisnin prej teje. Tani, në mënyrë paradoksale, kërkon të qëndrosh në krye të një partie që e ke mohuar dhe për më tepër kundër vullnetit të shumicës absolute të demokratëve që më 11 dhjetor në Kuvend e më pas më 18 dhjetor me referendum, të shkarkuan nga kryetari!

Nëse ti nuk do e dije këtë realitet mbase dhe mund të faleshin këto qëndrime, por ti më mire se kushdo e di që demokratët nuk i ke me vete. Minimalisht ti je në dijeni të faktit se si me gjithë përpjekjet e bëra, nuk arrite të mbushesh as sallën e Pallatit të Kongreseve me demokrat të thjeshtë e jo më me delegatë. Nuk mjaftuan as familjarët, as punëtorët e disa bizneseve që erdhën me detyrim, as njerëzit e marrë nga rruga, po u deshën dhe socialistët e Ramës për të mbushur sallën me 2 mijë vende…! Këtë ti e di shumë mirë, pavarësisht se çfarë deklaron publikisht.

E megjithëse i di të gjitha këto, ti zgjedh që pas përdorimit të sulmeve të Ramës të kopjosh pikë për pikë dhe qëndrimet e tij. E fillove me hile e truke “procedurash” , vazhdove me mosnjohjen e votës së shumicës e tani përfundove tek blindimi e bunkerizimi i selisë së PD!

Rama me këto mënyra mbron karrigen e tij të pushtetit, po ti çfarë po mbron, karrigen e opozitarit të përjetshëm?! Pse ?!

Ti e di që kështu, mund të jesh çdo gjë, po kryetar i demokratëve nuk mund të jesh kurrë. Po çfarë është më e rëndësishme ti e di shumë mirë që edhe sikur të përdoresh policinë dhe gjykatat e Ramës për të mbajtur një vulë e ca zyra boshe, as në ëndërr nuk i afrohesh dot më pushtetit e jo më ta marrësh. Atëherë për çfarë të duhet gjithë kjo që po bën?! Pse i gënjen ende ata pak demokratë të thjeshtë që besojnë me naivitet përrallën se vërtetë pengesa për të marrë pushtetin paska qenë Berisha e tani pushtetin do na i sjellin në pjatë?!

Në kushte të tilla dy alternativa mbetën:

-Të intereson thjesht karrigia e kryetarit të opozitës për interesa personale biznesi.

-Me ose pa vullnetin tënd, je pjesë e atyre që kërkojnë shkatrrimin e PD për ti lehtësuar mbretërimin Ramës.

Për të qenë i sinqertë, unë nuk kam dashur të pranojë asnjërën prej këtyre akuzave edhe në respekt të vetes time (gjithnjë për hir të këtyre tetë viteve të fundit). E po për këtë arsye po bëj dhe një propozim të fundit me shpresë të vagët se mund ta dëgjosh jo vetëm për të mirën e demokratëve por dhe tënden personale dhe të atyre pak vetëve që të ndjekin.

Ky është një mendim tërësisht personal dhe nuk ka asnjë lidhje me pozicionin që unë kam sot si njeri prej 29 antëarëve të Komisionit të Rithemelimit të PD.

E kam thënë që në fillim të “konfliktit” se vetëm VOTA e demokratëve e zgjidh problemin. Në këto kushte, mbetet dhe një hapësirë e fundit; zgjedhjet në PD për të gjitha strukturat, përfshi dhe kryetarin e PD. Kuvendi i 11 dhjetorit ka caktuar një periudhë dhe 22 marsin si ditën e zgjedhjeve si dhe ka ngarkuar Komisionin e Rithemelimit për organizimin e tyre. Unë mendoj që për interesa madhore të PD çdo gjë mund të negociohet për të zhvilluar një proces të pastër e me besimin e të gjithëve.

Demokratët të vendosin me votën e tyre sepse vetëm kështu qëndrojmë të bashkuar dhe gjithë energjitë tona i përqëndrojmë në luftën kundër Ramës. Bëhu pjesë e këtij procesi.

Kush fiton drejton! Por edhe ai që humbet, nuk humb përfundimisht!

Zoti Basha, ti je ende i ri, kështu që edhe po të humbësh në këtë garë, nuk do të ishte fundi i karrierës tënde politike. Nëse do ndiqje këtë rrugë, kam bindjen që dhe shumica e demokratëve që sot janë kundër teje, do dinin të falnin e pse jo dhe të të mbështesnin në një të ardhme. Ndërkaq rruga ku je futur e po ndjek është fundi sepse nëse i çon demokratët deri në perplasje, nuk bën gjë tjetër veçse shërben si kamikaz për interesin e Ramës i cili është i vetmi që përfiton.Prandaj zgjidh vërtetë të ardhmen tënde dhe të PD, e prano votën e demokratëve si mekanizmin e kësaj të ardhmeje.