Hidhen në qarkullim prerjet e reja të 500 Lekë dhe 2000 Lekë

Banka e Shqipërisë hodhi sot në qarkullim dy prerjet e radhës së serisë së re të kartëmonedhave shqiptare me kurs ligjor, prerjet me vlerë 500 Lekë dhe 2000 Lekë.

Të dyja kartëmonedhat vijnë me një dizajn të rifreskuar, por ruajnë të njëjtat motive të paraqitura në prerjet ekzistuese përkatëse. Sipas njoftimit zyrtar të Bankës së Shqipërisë, ato pasqyrojnë ndryshime të lidhura me konfigurimin në tërësi të elementeve të shtuara dhe të përmirësuara të dizajnit dhe të sigurisë së kartëmonedhave.

Kartëmonedha 500 Lekëshe ka në pjesën e përparme portretin e Ismail Qemalit, me simbolin e shqiponjës dhe penën me të cilën u firmos akti i pavarësisë. Në pjesën e prapme është e stampuar ndërtesa ku u bë shpallja e pavarësisë, telegrafi me të cilin u përhap lajmi i shpalljes së pavarësisë dhe dhoma ku u morr vendimi.

Kartëmonedha 2000 Lekëshe ka në pjesën e përparme portretin e Mbretit Gent, sundimtari i fundit i shtetit ilir, ndërsa në pjesën e prapme elemente të arkitekturës së antikitetit ilir, si dhe bima medicinale Gentiana Lutea.

Me këto dy kartëmonedha, Banka e Shqipërisë plotëson hedhjen në qarkullim të serisë së re të kartëmonedhave, e cila përbëhet nga 6 prerje: 200, 500, 1000, 2000, 5000 dhe 10000 Lekë. Kartëmonedhat e reja do të përdoren si mjete pagese, së bashku me kartëmonedhat ekzistuese të të gjitha prerjeve, që do të vazhdojnë të qarkullojnë dhe të kenë kurs ligjor si më parë.

Banka e Shqipërisë i inkurajon përdoruesit të jenë të përgjegjshëm dhe të kujdesshëm në trajtimin e çdo kartëmonedhe që mbajnë në dorë, për të ruajtur jetëgjatësinë, cilësinë dhe integritetin e tyre. Njëkohësisht, Banka e Shqipërisë përsëriti edhe njëherë thirrjen për të lexuar në mënyrë të saktë vlerën e kartëmonedhave, duke shmangur emërtimet e vjetër apo e re./Monitor/