Primaret e PD, Balla si Basha: Produktet që vijnë nga non-grata, mbeten non-grata!
Partia Socialiste vijon negociatat me PD për të gjetur formulimet të mandatit të Komisionit të Posacëm të Reformës Zgjedhore, tha sot Kryetari i Grupit parlamentar të PS, Taulant Balla, dhe në sinkron me Lulzim Bashën komentoi dhe rezultatin i cili doli dje nga Primaret e organizuara nga Komisioni i Rithemelimit të PD-së për zgjedhjet e 6 marsit ku u përzgjodhën kandidatët për Kryetar të 6 bashkive .
“Këtu do përgjigjem personalisht dhe jo i kreu i Grupit Parlamentar të PS. Non-grata ngelet non-grata, dhe produktet që vijnë nga non-grata mbeten non-grata,” tha Taulant Balla ndërsa për kërkesën e opozitës për ndryshime kushtetuese lidhur me Reformën Zgjedhore shtoi:
“Për këtë çështje po, kemi një qasje dhe një diskutim me grupin parlamentar të PD, me PD zyrtare për të gjetur formulimet e sakta sa i përket objektit të mandatit të komisionit të posacëm të reformës zgjedhore. Formulimi i objektit të punës, përcakton qartë vijueshmërine dhe nuk du atë ketë ngecje përgjatë këtij komisionit.
Qëndrimi ynë ka qenë i qartë, duam të ruajmë të njëjtin përcaktim. Hartimi dhe më pas futja në ligjin zgjedhor të gjitha rekomandimeve nga OSBE. Është një detyrim që Shqipëria ka edhe në kuadër të integrimit. Edhe opozita duhet të kuptojë sa më shpejt të nisë puna aq më mirë është për të gjitha palët sepse koha në dispozicion vjen duke u shkurtuar.”
Në fund, ndryshe nga kolegu i tij socialist Erion Braçe i cili ankohet se po pësojnë fermerët nga Ballkani i Hapur, sot kryetari i Grupit Parlamentar të PS, Taulant Balla, tha se Shqipëria është ndër vendet më përfituese të nismës Ballkani i Hapur.
“Kemi kaluar në seancën e fundit edhe disa projektligje, që kanë të bëjnë me implementimin e marrëveshjeve, në kuadër të Ballkanit të Hapur, që krijon më shumë mundësi për biznesin dhe qytetarët,” tha Taulant Balla duke përfunduar:
“Unë bëj pjesë në ata që mendojnë se Shqipëria është një ndër vendet më përfituese të kësaj nisme. Po ashtu edhe sipërmarrja, fermerët, janë përfitues të drejtpërdrejtë.”
