Urime Kosovë, nga Presidenti Biden deri te Presidenti Cassis

Presidentja Vjosa Osmani, mori urime me rastin e 14 vjetorit të shpalljes së Pavarësisë së Kosovës nga liderët më të rëndësishëm botëror ku nuk mungoi dhe mbështetja për të ardhmen e shtetit i cili u mbështetë pa dallim nga Perëndimi që nga ditët e para të krijimit.

Presidenti i shtetit që krijoi Kosovën, SHBA, Joe Biden, duke uruar popullin e Kosovës për Ditën e Pavarësisë, tha se vazhdon të mbështesë një marrëveshjeje gjithëpërfshirëse me Serbinë të përqendruar në njohje reciproke.

“Jemi të kënaqur që Kosova po vazhdon të ndërtojë dhe forcojë marrëdhëniet e saj pozitive me vendet fqinje dhe do të vazhdojmë të mbështesim përpjekjet tuaja drejt një marrëveshjeje gjithëpërfshirëse të normalizimit me Serbinë, të përqendruar në njohjen reciproke,” thuhet në urimin e Presidentit Biden ku renditen dhe të arriturat e vendit duke thënë se Kosova është shndërruar nga një demokraci e brishtë në një shtet të konsoliduar.

“E përshëndes përkushtimin tuaj për punën e vazhdueshme dhe jetike për forcimin e institucioneve të Kosovës dhe për t’u siguruar që demokracia e Kosovës sjellë rezultate për të gjithë qytetarët e vendit tuaj. Shtetet e Bashkuara do të mbeten partner i palëkundur i Kosovës përderisa ju përpiqeni ta luftoni korrupsionin dhe ta forconi sundimin e ligjit, të mbroni të drejtat e pakicave fetare dhe etnike, të nxisni një rritje ekonomike të drejtë dhe transparente dhe të siguroni një të ardhme të qëndrueshme energjetike,” shprehet Presidenti Biden duke uruar se vitin e kaluar, Kosova vazhdimisht demonstroi lidership në skenën ndërkombëtare.

“Nga ofrimi i strehimit të sigurt për të pambrojturit deri te forcimi i sigurisë globale dhe bashkëvendosja përkrah ushtrisë amerikane në Kuvajt, populli i Kosovës i ka dëshmuar botës trimërinë dhe bujarinë e tij. Ndërsa përballemi së bashku me pandeminë COVID-19, jam i kënaqur që Shtetet e Bashkuara patën mundësi të ofrojnë këtë muaj edhe gjysmë milioni doza të sigurta e efektive të vaksinës COVID-19 për të mbrojtur dhe ndihmuar Kosovën në ringritje nga pandemia,” tha Presidenti duke mos harruar edhe faktin se Kosova zë një vend të veçantë në zemrën e tij.

“Siç e dini, Kosova zë një vend të veçantë në zemrat e familjes Biden. Ju falënderoj përsëri për nderimin e madh që i bëtë djalit tim Beau kur i dhatë atij post-mortem medaljen presidenciale për sundimin e ligjit vitin e kaluar”, shkroi Biden.

Në fund, Presidenti Biden tha se mezi pret të vazhdojnë përpjekjet tona të përbashkëta për të thelluar partneritetin në mes vendeve tona dhe për ta jetësuar të ardhmen e Kosovës si një demokraci dinamike, sovrane, e multietnike, duke zënë vendin e merituar në institucionet evropiane dhe euroatlantike, ndërsa përfundon:

“Ju uroj juve dhe gjithë popullit të Kosovës një festë të shëndetshme dhe të gëzueshme ndërsa ju festoni pavarësinë tuaj!”

Presidenti i Gjermanisë, Frank-Walter Steinmeier, duke uruar Presidenten e Republikës së Kosovës, Vjosa Osmani me rastin e 17 Shkurtit, Ditës së Pavarësisë, rikutjon vitin 2008, kur ai ishte ministër i Jashtëm gjerman dhe bashkë me homologë të tjerë nga SHBA dhe Evropa u deklaruan pro njohjes së pavarësisë së Kosovës.

“Ndaj është kënaqësi e veçantë të mund t’ju uroj në përvjetorin e katërmbëdhjetë të pavarësisë së vendit tuaj. Vendet tona janë të lidhura ngushtë me njëri-tjetrin në pikëpamje politike, ekonomike dhe kulturore. Veçanërisht afër na sjellin kontaktet e shumta personale, para së gjithash ato të diasporës kosovare në Gjermani,” thekson Presidenti Steinmeier duke duke garantuar se Gjermania mbështet fuqishëm perspektivën e Republikës së Kosovës në Bashkim Evropian.

“Gjatë vizitës suaj shtatorin e shkuar në Berlin ne patëm mundësi të thelloheshim në aspekte të shumta të marrëdhënieve tona dypalëshe. Gjermania mbështet fuqishëm perspektivën e Republikës së Kosovës në Bashkim Evropian. Në këtë kontekst një rëndësi të madhe merr realizimi me vendosmëri i agjendës së rëndësishme të reformave të qeverisë suaj në luftën kundër korrupsionit dhe krimit të organizuar. Ky do të jetë një faktor qendror në krijimin e perspektivave për të rinjtë në Kosovë, forcimin e ekonomisë, investimet e reja si dhe hapjen e vendeve të punës,” thuhet në urimin e Presidentit të Gjermanisë Frank Walter Steinmeier duke garantuar se Kosova mund të ketë besim, se Gjermani do të gjejë një mik dhe partner të besueshëm në krah të saj.

Presidenti i Italisë, Sergio Mattarella, duke theksuar angazhimin e shtetit që drejton për ta sjellë Kosovën dhe shoqërinë e saj civile më afër Evropës, uron Presidenten e Kosovës, Vjosa Osmani, me rastin e 17 shkurtit, Ditës së Pavarësisë .

“Në vazhdën e miqësisë dhe afërsisë që bashkon vendet tona, Italia do të vazhdojë ta mbështes Kosovën në përpjekjet e saj për konsolidimin e institucioneve demokratike, në një perspektivë evropiane që urojmë se do të jetë gjithnjë e më e prekshme. Në këtë frymë do të vazhdojmë të punojmë për ta sjellë Kosovën dhe shoqërinë e saj civile më afër Evropës, veçanërisht brezat e rinj,” thuhet në telegramin e Presidentit Mattarella duke shtuar se Italia do të vazhdojë të jetë në ballë sa i përket paqes dhe sigurisë në Ballkan.

“Këtë e dëshmon roli ynë në misionin e NATO-s, KFOR-it të cilin do të vazhdojmë ta garantojmë pa iu shmangur angazhimeve tona,” thekson në telegramin e tij, Presidenti i Italisë, Sergio Mattarella, duke uruar Presidenten dhe qytetarët e Kosovës për një të ardhme të begatë.

Urimi për këtë ditë të madhe të shqiptarëve nuk mungoi as nga Buckingham Palace.

“Me rastin e festës së rëndësishme të ditës suaj të pavarësisë, dua ta përgëzoj Shkëlqesinë Tuaj dhe t’ia dërgoj urimet e mia popullit të Kosovës. Ndërsa i kapërcejmë sfidat globale shëndetësore së bashku, me vendosmëri dhe këmbëngulje, uroj që të kemi periudha më të mira në të ardhmen,” thuhet në urimin e Mbretëreshës Elizabeth drejtuar Presdentes së Kosovës, Vjosa Osmani me rastin e 17 Shkurtit, Ditës së Pavarësisë.

Bosnje Hercegovina nuk e njeh zyrtarisht Kosovën shtet të pavarur dhe sovran, por kjo nuk e pengoi Presidentin e radhës së BeH, Zhelko Komshiç që të uroj Presidenten e Kosovës, Vjosa Osmani, me rastin e 14 vjetorin e pavarësisë së Kosovës..

Duke u shprehur se Bosnje Hercegovina dhe Kosova ndajnë prioritete strategjike të politikës së jashtme, siç janë anëtarësimi në NATO dhe Bashkim Evropian, Presidenti Komshiç në urimin e tij thekson se ky qëllim arrihet vetëm duke bashkëpunuar me partnerët që ndajnë të njëjtat vlera.

“I inkurajuar dhe i gëzuar për përmirësimin e raporteve e dy shteteve tona mike, ne jemi të bindur se bashkëpunimi ekonomik, politik dhe çdolloj bashkëpunimi tjetër, por edhe raportet miqësore midis Bosnje e Hercegovinës dhe Republikës së Kosovës do të jenë të një rëndësie të posaçme për qytetarët e shteteve tona në një të ardhme të afërt,”, shprehet në urimin e tij Presidenti i radhës së BeH, Zhelko Komshiç.

Presidenti i Austrisë mike, Alexander Van der Bellen, në urimin drejtuar Presidentes së Kosovës, Vjosa Osmani, me rastin e 17 Shkurtit, ditës së pavarësisë, thekson se Kosova dhe Austria kanë marrëdhënie të shkëlqyera dypalëshe.

“Austria dhe Kosova kanë marrëdhënie të shkëlqyera dypalëshe, politike, ekonomike, shkencore dhe shkëmbime kulturore. Pavarësisht pandemisë, vizita juaj, zonja Presidente, dhe disa vizita në nivel qeveritar e kanë thelluar më tej këtë bashkëpunim përgjatë vitit 2021,” thekson Presidenti Van der Bellen duke shtuar se mirëpret dhe mbështet miqësinë dhe partneritetin e rëndësishëm ndërmjet dy vendeve.

I vëmendshëm ndaj kësaj feste të madhe kombëtare shqiptare ishte dhe President i Zvicrës, Ignazio Cassis.

“Bashkëpunimi ynë i shkëlqyer si dhe marrëdhëniet e mira dhe miqësore të bazuara në besimin reciprok në mes të dy vendeve tona janë kyçe për të trajtuar së bashku sfidat e mëdha globale dhe rajonale,” thekson Presidenti Cassis në urimin drejtuar Presidentes së Kosovës, Vjosa Osmani, duke uruar qytetarët e Republikës së Kosovës një të ardhme paqësore dhe të begatshme.