Dialogu Kosovë-Serbi, takimi i radhës më 22 Shkurt

Të martën, më 22 shkurt, në Bruksel pritet të zhvillohet takimi i radhës në kuadër të dialogut ndërmjet Kosovës dhe Serbisë, në nivel të kryenegociatorëve. Këtë e ka konfirmuar zëdhënësi i Bashkimit Evropian për Çështje të Jashtme dhe Siguri, Peter Stano.

“Takimi i ardhshëm në nivel të kryenegociatorëve do të zhvillohet në Bruksel më 22 shkurt, mikpritës i të cilit do të jetë i dërguari i Posaçëm i BE-së, Miroslav Lajçak. Ky raund i takimeve do të shërbejë për të vazhduar diskutimet e lidhura me implementimin e marrëveshjeve të deritashme dhe hapat e ardhshëm në normalizimin e raporteve mes Kosovës dhe Serbisë,” tha Peter Stano duke u përgjigjur në një pyetje të RFE.

I pyetur rreth mundësisë që së shpejti të ketë takim të nivelit të lartë në kuadër të dialogut, ndërmjet kryeministrit të Kosovës, Albin Kurti, dhe presidentit të Serbisë, Aleksandar Vuçiç, Stano tha se zhvilimi i një takimi të tillë do të bëhet i ditur në një kohë të përshtatshme.

Burimet e BE-së kanë thënë për RFE se janë duke u bërë përpjekje që një takim i nivelit të lartë të zhvillohet para zgjedhjeve në Serbi, pasi takime të tilla nuk ka pasur që nga vera e vitit të kaluar. Po ashtu, janë shprehur se nga takimi i javës që vjen në nivel të kryenogociatorëve, do të varet edhe mundësia e një takimi në nivel të lartë.

Më parë, përfaqësuesi i Lartë i BE-së për Politikë të Jashtme dhe Siguri, Josep Borrell, është shprehur se “takimet do të thirren kur të ketë sinjale të qarta nga palët se janë të gatshme që në ato takime të arrihet përparim”.