Shi, borë dhe rënie temperaturash, ARRSH: Rekomandohet zinxhir në akset…
Gjatë natës dhe në orët e para të mëngjesit vendi eshtë përshkuar nga mot me reshje shiu dhe dëbore në zonat malore duke shkaktuar probleme në shumë zona ku veçohen Kruka dhe Korça.
“Kontraktorët kanë qenë në terren për pastrimin e rrugëve nga bora, nga rënia e materialeve në zonat me intensitet shiu dhe kanë bërë shpërndarjen e kripës për të evituar ngricat,” thekson Autoriteti Rrugor Shqiptar, ARRSH, duke rekomanduar përdorimin e zinxhirëve në aksin Krujë-Sarisalltik.
Ndërkohë drejtuesve të mjeteve u rekomandohet të reduktojnë shpejtësinë, të pajisen me zinxhirë dhe goma dimërore dhe të ndjekin udhëzimet e Policisë Rrugore.
Në Krujë, reshjet kanë nisur në orët e para të mëngjesit dhe aktualisht niveli i borës është pak centimetra ndërkohë temperaturat tashmë janë ulur ndjeshëm.
Qyteti është përfshirë nga era e fortë e cila po vështirëson lëvizjen e këmbësorëve edhe në Krujë.
Ndërsa edhe Korça u zgjua me temperatura të ulëta dhe reshje borë ndërkohë raportohet se prej tri ditësh kjo zonë po përballet edhe me mungesë të energjisë elektrike.
Situata më e rënduar është në Bashkinë e Devollit, ku prej tri ditësh mungon energjia elektrike ashtu si dhe në Pustec e Zagradec ku janë dëmtuar shtyllat elektrike.
Në bashkinë e Maliqit kanë mbetur pa energji 10 fshatra , Pojan, Pendavije, Zvezde, Zemblak, Shengjergj, Burimas dhe shumë fshatra në njësinë Moglice dhe Lozhan. Nga 8 shtylla të rrëzuara në fshatin Zvezdë të Bashkisë Maliq deri më tani 6 janë zëvendësuar.
Ndërsa bashkinë e Kolonjës kanë mbetur pa energji fshatrat Shelegur, Shales, Piskal.
Në Pogradec gjithashtu 10 fshatra janë pa drita. Raportohet se një pjesë e madhe e shtyllave të rrëzuara janë riparuar ndërsa vijon puna për të kthyer energjinë elektrike atje ku ajo mungon.
Ndërkohë OSHEE raporton gjithashtu se vijon puna për stabilizimin e situatës së furnizimit me energji elektrike dhe eleminimin e avarisë edhe në zonën e Përmetit.
Njoftimi i ARRSH:
Gjatë natës dhe në orët e para të mëngjesit vendi eshtë përshkuar nga mot me reshje shiu dhe dëbore në zonat malore.
Kontraktorët kanë qenë në terren për pastrimin e rrugëve nga bora, nga rënia e materialeve në zonat me intensitet shiu dhe kanë bërë shpërndarjen e kripës për të evituar ngricat.
Qarkullimi kryhet pa probleme në të gjitha akset nacionale në Krujë-Sarisalltik rekomandohet përdorimi i zinxhirëve.
Drejtuesit e mjeteve duhet të bëjnë kujdes në lëvizje, të respektojnë sinjalistikën rrugore të reduktojnë shpejtësinë, të pajisen me zinxhirë dhe goma dimërore të ndjekin udhëzimet e Policisë Rrugore.
