Albin Kurti: Nuk kemi kërkesë që avionët MIG-29 të dërgohen nga Kosova në Ukrainë

Kryeministri Albin Kurti tha se nuk kanë marrë asnjë kërkesë që nga Kosova të dërgohen avionët luftarakë MIG-29 në Ukrainë.

Kryeministri e përsëriti se Kosova dëshiron të anëtarësohet sa më shpejt që është e mundur në NATO, pasi që momentalisht është një situatë e jashtëzakonshme dhe nuk mund të ketë sjellje të zakonshme ndërsa shtoi se sapo të marrin një kërkesë të tillë, së bashku me institucionet tjera do të japin përgjigjen e duhur në kohë rekord.

“Ne nuk kemi marrë një kërkesë të tillë, ndonëse Kosova nuk është vend anëtare e NATO-s, ne e kemi NATO-në në Kosovë, dëshirojmë të anëtarësohemi sa më shpejt të jetë e mundur. Në një situatë të jashtëzakonshme që po kalon, jo vetëm kontinenti jonë nuk mund të sillemi në mënyrë të zakonshme. Prandaj, ju kemi bërë thirrje aleatëve tanë strategjikë që të konsiderojnë shumë seriozisht përshpejtimin e proceseve integruese për Kosovën, me këtë rast edhe anëtarësim në NATO,” tha Albin Kurti pas vizitës në fabrikën e vajit në Gjilan duke shprehur gatishmërinë ta trajtoj edhe një kërkersë të tillë për të cilën raportuan mediat ndërkombëtare duke ju referuar burimeve zyrtare:

“Nuk e kemi një kërkesë të tillë për vendin tonë, kur ta marrin një kërkesë me qeverinë, presidenten, kuvendin do të trajtojmë dhe do të japim në kohë rekord përgjigjen e duhur.”