Dorëheqja e Bashës, sondazh i “Vullnetarëve të Lulit”!

nga Agim Popoci

Që të mund të japësh dorëheqje, duhet të kesh karakter! Kështu thotë Goethe, por bashkëpunëtorët e Lulzim Bashës duke qenë përgjithësisht njerëz që nuk lexojnë, i kërkojnë Bashës duke mos e njohur dhe aq mirë, që të jap dorëheqje!

Situata nuk ishte e papritur vetëm për Lulzim Bashën kur edhe Grida me Salianjin, madje edhe Enkelejdi me Joridën, i kërkuan të jap dorëheqje!

Por, njeriu pa karakter ama me njohuri juridike, Lulzim Basha, filloi të mendonte që ti gjente dorëheqjes një pleonazëm, ose si t’ia bënte me dorëheqjen dhe detyrimisht ta gjente të kundërtën e të “parevokueshmes”.

Grupit Parlamentar i cili e pranoi idenë e “hapit pas me Sali Berishën” ndonëse  po i kërkonin një njeriu të përjashtuar edhe nga Partia që të bëjë një hap pas, Lulzim Basha i gjeti shumë shpejtë dhe një arsye absurde që do ta shoqëronte dorëheqjen e tij, pasi të jetë konsultuar me Kolegjin e Kryetarëve ose kryetarët e Degëve të PD, që për fatin e mirë të Lulit nuk kanë as karakter dhe as njohuri juridike, pikërisht siç i duheshin Ramiz Alisë në prag të 22 shkurtit 1991, ata që u pagëzuan “Vullnetarët e Enverit”.

U tha, u bë, dhe Kolegji i Kryetarëve u thirr të diskutoj rreth dorëheqjes së Lulzim Bashës! Kolegji nuk iu përgjigj por një pjesë tij si “Vullnetarë të Lulit” u panë të parakalojnë drejt derës së blinduar të selisë së PD, për ti kërkuar liderit që të mos jap dorëheqje, pa e kuptuar në fakt se çfarë është dorëheqja!

Ti thuash Luan Hotit se dorëheqja është akt personal i atijë që e jep, dhe se me dhënien e dorëheqjes i shuhet e drejta e postit që kryen, është humbje kohe, kur njeriu më i humbur në Durrës vazhdon e ngushëllon veten se ai nuk ka humbur më 6 Mars, dhe fitoren e Ardi Mukës ndaj tij e ka mundësuar Kryeministri Edi Rama.

Ti thuash Agron Kapllanajt se dorëheqja është përfundimtare nga momenti kur ajo jepet dhe nuk mund të tërhiqet, është e kot, po aq sa posti që mbanë ky i dërguar nga Mallakastra ndër demokratët e Fier. Lëre pastaj ti thuash kryetarit të emëruar të PD Dega Fier pa asnjë anëtarë, se dorëheqja hynë në fuqi në momentin kur informohet organi i cili e ka zgjedhur atë që jep dorëheqje; Kjo është një fantashkencë për “kryedemokratin” e Fierit që merr tendera nga kryesocialisti i Tiranës, Durrësit dhe gjithë Shqipërisë!

Ose, ti thuash dhe Xhemal Bushatit që nga “Vullnetarët e Lulit” edhe mund të veçohet me ca gram tru, se është e tepruar të thuhet se dorëheqja është e parevokueshme në çdo rrethanë. Pleonazëm nuk i thua dot kur Xhemali e pranon se është “fitues pa vota” dhe se nuk ka humbur  ndonëse Dr.Bardh Spahia tashmë ka edhe mandatin nga KQZ!

Ti thuash Ymer Markut se si është e mundur që më shumë njerëz kishte në miting se sa vota që mori, nuk ta shpjegon dot pasi që votimi ishte elektronik dhe nuk arriti të blejë vota aq sa duhet, ama të mundohesh ta bindësh se për dorëheqje nuk bëhet kurrë debat sepse shkaqet janë shumë personale, dhe renditja e tyre mund ta prek dhe privacinë e Lulit të vetë, betejën e ke të humbur! Sepse, thjeshtë po flet me një njeri që vazhdon të jetë i bindur, si të gjithë “Vullnetarët e Lulit”, që Sali Berisha nuk do të kthehet në PD, Grupi Parlamentar është shitur te Doktori dhe Basha nuk duhet të jap dorëheqje!   

Pse nuk ka debat për dorëheqje nuk ke se si e sqaron as kandidatin e Lulit për Lushnje, Indrit Sefën, ndonëse është avokat. Ta thërasësh për debat, duke e ditur se nuk mund të dal kurrfarë vendimi, sepse vendimi ekziston, dorëheqja, për një demokrat normal është fyerje më e madhe se sa kandidimi në një zonë elektorale ku nuk mund të fitosh as në një lagje duke pasur shef Lulin! Për Indritin, u kuptua!

Por ja që të tillë vullnetarë i do Luli, që nuk e dinë se dorëheqja në momentin që dorëzohet “për dijeni”, ajo juridikisht është e kopsitur. Ose avokat si Marash Logu që nuk e kupton se si abdikimi që është për organet jozgjedhore, mbreti për shembull, dorëheqja është për organet zgjedhore!

Dhe këtë Luli e di shumë mirë si Jemini që hesht, ashtu siç e dinë  se jo Kolegji i Kryetarëve, por sikur të deklarohet për “dorëheqje” edhe antëarësia e PD që e ka zgjedhur për Kryetar, për pranim ose refuzimin e saj, dorëheqja më nuk ka kuptim.

Në këtë moment kemi të bëjmë me sondazh mbi besimin e Lulit për postin e Kryetarit, por je dhe mbështetje e mendimit të Kolegjit të Kryetarëve nga demokratët shqiptarë që po shikojnë këtë maskaradë të radhës së Lulzim Bashës.

“Vullnetarët e Lulit” në Kolegjin e Kryetarëve edhe mund të deklarohen kundër dorëheqjes së Lulit, por ajo nuk ka kurrfarë kuptimi juridik përderisa nuk është marrë nga një organ kompetent.

E meqë Luli mbanë afër vetes sovjetik dhe vazhdon e thotë se ka arsimim perëndimor, për të mos na shitur djathin për sapun, siç u bënë demokratëve, Dictionary of Politics and Government, third edition, Bloomsbury 2004, fq. 212. thotë se dorëheqja, “resignation” është “akt i heqjes dorë nga puna” (The act of giving up job)  

Si, dhe, Nouveau petit Larousse, Paris 1954, fq. 284. që thotë se dorëheqja, “démissio”,  është akt me të cilin heq dorë nga posti, nga shërbimi” (Acte par lequel on se démet d’un emploi).

A do të jap dorëheqje Lulzim Basha, pas epilogut të turpshëm të 8 Janarit dhe humbjes së 6 Marsit, këtë nuk mund ta dinë 40 deputetë që mezi i mblodhën 40 mijë vota më 6 Mars, madje as anëtarët e Kolegjit të Kryetarëve që nuk janë kryetarë dhe të tillë i ka për zemër Luli!

Kjo është dhe arsyeja pse ky vend ka për Kryeministër Edi Ramën, që nuk i duhet lideri i opozitës përderisa Kunati i tij nuk kishte dhe nuk ka, dualizëm!