Gjykata e Apelit, edhe tre vite burg  për policin që vrau Klodian Rashën

Dënohet me 18 vite burg efektivi Nevaldo Hajdaraj, i cili vrau Klodian Rashën në vitin 2020, por për shkak të gjykimit të shkurtuar ai do të vuaj 12 vite burg.

Gjykata e Apelit ashpërsoi masën e dënimit për policin që qëlloi për vdekje me plumb pas shpine të riun në orët e para të 8 dhjetorit 2020 në rrugicën e shtëpisë së 25 vjeçarit në Laprakë. Nga 15 vite që ishte dënuar nga gjykata e Tiranës, shkalla e dytë e gjyqësorit e cilësoi fajtor policin për akuzën e vrasjes me dashje dhe dënoi me 18 vite burgim.

Hajdaraj sipas Apelit e vrau me dashje 25 vjeçarin, teksa ky i fundit largohej me vrap duke mos iu bindur urdhrit të policisë për t’u ndalur pasi kishte dalë jashtë orës policore që ishte vendosur atëkohë për shkak të pandemisë.

Polici pretendoi se qëlloi mbi Rashën për shkak se kishte dyshime se ai ishte i armatosur dhe ndjeu rrezik, por kjo rezultoi e pavërtetë, pasi i riu nuk kishte në duar asnjë send të paligjshëm.

Në seancë, pasi dëgjoi prokurorinë dhe mbrojtjen, raporton BW, gjykata i dha fjalën babait të Klodian Rashës. Qazim Rasha këmbënguli për drejtësi dhe iu kërkoi gjyqtarëve ta vinin veten në vendin e tij.

Vrasja e Klodian Rashës solli reagime të forta dhe protesta që çuan në largimin e ministrit të Brendshëm të kohës, Sandër Lleshaj.