Alibeaj thirrë Grupin por jo Berishën, reagimi: I pari në mbledhje do jetë Sali Berisha!
Kryetari i Grupit Parlamentar të PD-së, Enkelejd Alibeaj, ka thirrur për nesër mbledhjen e Grupit ku në mesin e atyre që nuk janë ftuar vazhdon të jetë lideri historik Sali Berisha, atijë të cilit Alibeaj i tha edhe në sy se me non grata Partia Demokratike nuk ka të ardhme.
Por i menjëhershëm ishte reagimi i Berishës i cili si ditën kur shkeli në selinë e PD pas vendimit të Gjykatës Civile e cila njohu ndryshimet e Statutit në Kuvendin e 11 Dhjetorit ashtu dhe sot, i bëri të qartë se Grupi Parlamentar i Partisë Demokratike është një.
“Përshëndetje! Nesër në orën 09:00 do të zhvillojmë mbledhje grupi në seli. Ju faleminderit!”, thuhej në mesazhin që i ka dërguar Grupit Parlamentar të PD-së, Sekretari i Grupit, Arbi Agalliu.
I vendosur ta kthejë Partinë Demokratike në normalitet edhe në mënyrën e funksionimit, pas heqjes së blindave të Lulzim Bashës, lideri historik Sali Berisha tha se ai i pari do jetë në këtë mbledhje ndonëse Alibeaj me mendjen e tij ka pranuar që në mbledhje të Grupit të jenë të përjashtuarit, por jo dhe Berisha.
“I pari që do të jetë në atë mbledhje është Sali Berisha. Sali Berisha ka një detyrim madhor absolut nga Kuvendi i 11 dhjetorit, të konfirmuar me referendumin e 18 dhjetorit dhe me zgjedhjet e 6 marsit. Nuk e di nëse zoti Alibeaj të jetë shprehur kështu dhe nëse ju ka autorizuar ju,” tha Berisha ndërsa ju përgjigjë mediave në shërbim të Edi Ramës që vazhdojnë dhe i ndihmojnë Lulzim Bashës, që sot ishin “kurioz” të dinë nëse kishte komunikim me kryetarin e Grupit Parlamentar për mbledhje të përbashkët:
“Jo, nuk ka grup të ndarë, ka një grup parlamentar, e kam theksuar dhe e theksoj edhe njëherë se e ndani ju, ai nuk është i ndarë,” tha lideri historik Sali Berisha duke e pranuar se ai nuk ishte ftuar por ishin kolegët që e kanë njoftuar dhe ai do të shkoj.
Ndryshe, kjo është mbledhja e parë e Grupit Parlamentar të PD e cila mbahet pas vendimit të Gjykatës Civile të Tiranës, e cila ndonëse e pazbardhur nga gjykata ka ndryshuar realitetin në Partinë Demokratike duke filluar nga selia, anëtarësia dhe Grupi Parlamentar, ku pjesa më e madhe e deputetëve e bënë të qartë se kush është fajtori për situatën e krijuar.
