Qeveria e Kosovës miraton pagën minimale 250 euro

Qeveria e Kosovës ka miratuar Projektligjin për rishikimin e buxhetit për vitin 2022 si dhe ka miratuar projektligjin që e përcakton pagën minimale në vlerë prej 250 euro neto, apo 264 euro bruto.

Ministri i Financave, Hekuran Murati, ka bërë të ditur se do të duhet të ndryshohen edhe ligjet që ndërlidhen me pagën minimale.

“Projektligji në fjalë ka për qëllim të ndryshojë shkallën tatimore në të ardhura personale dhe procedurat në përcaktimin e pagës minimale. Përmes këtij ligji synojmë të eliminojmë pasiguritë juridike për pagën minimale në nivel kombëtar. Miratimi i këtij projekligji në Qeveri i hap rrugë miratimit në Kuvend dhe më pas sjelljes në Qeveri të vendimit për rritjen e pagës në vlerë prej 264 euro apo përkthyer në orë punë 1.5 euro për orë,” tha Hekuran Murati duke shtuar se Qeveria e ka miratuar edhe ndryshimin e shkallës tatimore, që parasheh që të gjitha pagat të mos tatohen në 250-euroshin e parë.

Ndërkohë Qeveria e Kosovës ka marrë vendim për ndalimin e përkohshëm të eksportit dhe rieksportit të produkteve themelore agroushqimore. Ministrja e Industrisë, Ndërmarrësisë dhe Tregtisë, Rozeta Hajdari tha se agresioni rus në Ukrainë ka ndryshuar tregun global, derisa tregoi se cilat produkte do të ndalohen të eksportohen.

“Drithërat, mielli, vaji ushqimor, sheqeri dhe kripa”, tha Ministrja e Industrisë, Ndërmarrësisë dhe Tregtisë.

Ndryshe, Ministri i Financave, Punës dhe Transfereve, Hekuran Murati në mbledhjen e Qeverisë, tha se rishikimi i buxhetit është i jashtëzakonshme dhe se rishikimi i rregullt do të bëhet sërish në mes të vitit.

“Tre mujorin e parë të vitit kemi pasur 17 për qind më shumë të hyra, marrë parasysh edhe nevojën për mbështetjen e qytetarëve është parë e nevojshme të kemi një rishikim të tillë që të reflektohen këto të hyra. Vlera që i shtohet buxhetit është 150 milionë euro”, tha ai.