Kabuli i lulushëve!

nga Agim Popoci

“Të duket ndonjëherë sikur PD ra sikur Kabuli, erdhën talebanët për ta marrë, Basha iku si Ashraf Ghani dhe ata e morën pushtetin.” 

Kështu u shprehë njëri prej nënkryetarëve të Lulzim Bashës duke tejkaluar imagjinatën edhe të atyre që janë më ekstremistë në radhët e Komisionit të Rithemelimit të Partisë Demokratike, që me vendim të Gjykatës u nisën drejtë selisë së PD.

Akuza të shumta kishte pas 8 Janarit për ata që provokuan, rrahën me shkop bejsbolli, hodhën gaz lotsjellës dhe thirrën FNSH-në e Edi Ramës, por asnjëri nuk tha se ishte SHBA që i financoi mbështetësit e Lulit për ta luftuar Foltoren dhe Sali Berishën, si dhe për ta blinduar selinë e PD, si në rastin e Kabulit që ngriti dhe financoi pushtetin lokal e qendror dhe forcat e sigurisë, dhe në fund rezultoi se ato para ishin keqpërdorur ose më saktë ishin vjedhur.

Shumë ide janë hedhur për mënyrën se si është futur Sali Berisha në selinë e PD pas vendimit të Gjykatës së Tiranës, por as më militantët e liderit historik të Partisë Demokratike nuk janë shprehur se Berisha u fut në selinë e PD pasi Presidenti Biden hoqi dorë nga Lulzim Basha dhe kishte marrëveshje me SHBA, siç kishin talebanët, të cilët pa lejen e Shteteve të Bashkuara nuk do ta shikonin as në hartë Kabulin jo më ta pushtonin!

Për ikjen e Lulzim Basha janë ngritur shumë legjenda por as kokat më të nxehta në krah të Berishës nuk janë shprehur, se kur u largua nga selia e PD kishte thasë me para, siç kishte Ashraf Ghnai në helikopterin e tij, ndonëse e kanë deklaruar për shumë herë Lulzim Bashën si të korruptuar! Nëse Nënkryetari i PD u irritua nga numëruesi i parave që Komisioni i Rithemelimit e publikoi duke thënë se e kishte gjetur në zyrën e Bashës, mund ta pyes njeriun që e promovoi te Lulzim Basha se çfarë i hynë në punë kjo vegël Kryetarit kur ka një Kunat!   

Talebanët! Kjo shprehje është dëgjuar nga goja e Kryeministrit Edi Rama, Kryetarit të Bashkisë Tiranë, Erion Veliaj dhe zyrtarëve që i kanë nëpër këmbë, por kur dëgjohet edhe nga goja e nëkryetarit të Lulzim Bashës është përtej idesë së bashkëqeverisjes.

Për ti dhënë fund kësaj propagande komuniste mbi malokët, talebanët, çeçenët që edhe nënkryetari tjetër i Lulzim Bashës u dha mesazh pas 8 Janarit se “nuk ka më tokë e xanun në PD”,  qytetarët shqiptarët, lulushët dhe jo vetëm duhet ta dinë se sipas regjitsrimti të fundit të popullsisë, Qarku Kukës ka 114 mijë banorë ose 30%  më pak se në vitin 1990.

Sikur i gjithë ky 30%  të jetojë sot në Tiranë me 660 mijë banorë (shifër kjo zyrtare), ku mbi 40% e ndërtimeve janë informale, nuk bëhen dot talebanë aq më shumë pushtues. Pse e kanë këtë nam, nënkryetarët e Lulzim Bashës mund të shfletojnë gazetat dhe dokumentat shqiptare të kohës, për ta konfirmuar pse veriorët ishin dhe vazhdojnë të jenë halë në sy për komunistët!    

Dhe në fund, një e vërtetë që lulushët e harruan! Kur talebanët u futën në Kabul, shoqëria civile dhe pushteti i korruptuar i hipi avionit dhe u nis drejtë Edi Ramës. As këtë skenar nuk e kishin parashikuar më ekstremistët e Komisionit të Rithemelimit për bashkëpartiakët e tyre ndërsa u nisën drejtë selisë së PD. Dalëngadalë bashkëpunëtorët e Kryeministrit në krah të Lulzim Bashës po nxjerrin kokën, për të tjerët po kujdeset vetë Edi Rama, dhe e filloi nga sms-të